Грузінская паліцыя знесла намётавы гарадок пратэстоўцаў у Тбілісі
Намётавы гарадок у Тбілісі / Anadolu via Getty Images
Грузінская паліцыя зранку 19 лістапада разагнала пратэст каля Тбіліскага дзяржаўнага ўніверсітэта і знесла намётавы гарадок. Да месца пратэстаў паліцыя даставіла спецназ і вадамёты, аднак падчас разгону спецсродкі не выкарыстоўваліся.
Ёсць звесткі пра сутычкі паміж паліцыяй і пратэстоўцамі, піша jam-news.net. Адбыліся затрыманні, аднаго ўдзельніка акцыі забрала хуткая дапамога.
На момант разгону ў намётавым гарадку было некалькі соцень чалавек. Паліцыянтаў, якія іх выцяснялі, было нашмат больш.
Прэзідэнтка Грузіі Саламэ Зурабішвілі сёння плануе падаць у Канстытуцыйны суд пазоў пра масавыя парушэнні таямніцы галасавання на парламенцкіх выбарах 26 кастрычніка. Яна прапануе для развязання палітычнага крызісу часова пакінуць стары парламент і стары ўрад, а тым часам пачаць падрыхтоўку да новых выбараў.
