Ітан Голдрыч: Я буду чакаць навін аб вызваленні беларускіх палітвязняў

За некалькі дзён да свайго ад’езду з Беларусі Часовы павераны ў справах ЗША ў Беларусі Ітан Голдрыч паспеў зрабіць важную справу — урачыста перарэзаць чырвоную стужку ў новым памяшканні аддзела адукацыі, культуры і інфармацыі амбасады ЗША. І нават па старой беларускай традыцыі запусціў у памяшканне ката, якога, па прызнанні гаспадара, клічуць Чубайс.

Па словах Ітана Голдрыча, над праблемай пераезду аддзела ў новае памяшканне яму давялося працаваць фактычна ўсе два гады свайго знаходжання ў нашай краіне. Не без праблем, але з дапамогай беларускага МЗС і “Дыпсервіса” пытанне давялося вырашыць. Дарэчы, сама праблема ўзнікла з-за таго, што старое памяшканне аддзела адукацыі, культуры і інфармацыі на вуліцы Герцана сталічныя ўлады папрасілі вызваліць.

“Гэты новы офіс размясціўся ў адным з самых сучасных будынкаў Мінска і на 100% даступны для людзей з інваліднасцю. І я спадзяюся, што большасці нашых беларускіх сяброў, старых і новых, будзе падабацца наведваць гэты комплекс і браць удзел у нашых праектах”, — адзначае Ітан Голдрыч.

Што да саміх праектаў, якія рэалізуюцца аддзелам, то іх, па словах амерыканскага дыпламата, вельмі шмат.

Ітан Голдрыч: “Нашы праекты па сувязях з грамадскасцю — гэта выдатны сродак і магчымасць для беларусаў пазнаёміцца з амерыканцамі, гэта выдатная магчымасць разам атрымліваць асалоды ад канцэртаў і слухаць лекцыі, наведваць краіны — Беларусь і Амерыку, у межах праграм абмену. Альбо вывучаць замежную мову”.

І хваліцца, што ў новым сваім памяшканні супрацоўнікі аддзела ўжо актыўна працуюць над арганізацыяй чарговага музычнага фестывалю “Амбасовішча” (пройдзе фестываль 28 жніўня на тэрыторыі амбасады ЗША, плануецца яго онлайн-трансляцыя і онлайн-галасаванне, якое вызначыць пераможцу фестывалю — Еўрарадыё), фестывалю дакументальнага кіно і выступаў амерыканскіх музыкантаў. Будзе шэраг і іншых мерапрыемстваў, навуковых ды адукацыйных. Калі ж у каго з беларусаў ёсць свае прапановы: як палепшыць працу аддзела ці ёсць ідэя нейкага мерапрыемства, то Часовы павераны прапануе дзяліцца імі праз сайт амбасады ЗША.

Адказаў Ітан Голдрыч і на некалькі пытанняў Еўрарадыё.

Еўрарадыё: У суботу выйшаў на свабоду палітвязень Алесь Бяляцкі, на вызваленні якога настойвалі ЗША. Ці можа гэты факт стаць пачаткам наладжвання адносін паміж нашымі краінамі?

Ітан Голдрыч: Дзярждэпартамент апублікаваў афіцыйную заяву ў суботу, ў якой вітаў вызваленне Алеся Бяляцкага. У гэтай заяве ЗША зноў заклікалі вызваліць усіх палітзняволеных і аднавіць іх ва ўсіх палітычных правах. Там таксама сказана, што гэта менавіта тыя дзеянні, якія неабходныя для таго, каб нармалізаваць адносіны. І гэта асноўныя моманты для паляпшэння ўзаемаадносінаў, якія былі агучаныя ў гэтай заяве. Для таго, каб было паляпшэнне, пазітыўнае развіццё, неабходна, каб усе палітычныя зняволеныя былі вызваленыя.

Еўрарадыё: Такім чынам, словы пра тое, што, маўляў, мы вызвалілі Бяляцкага і зрабілі першы крок насустрач, а цяпер такі крок хай зробіць ЗША і здымае санкцыі, да прыкладу, з аднаго беларускага прадпрыемства, будуць бессэнсоўныя?

Ітан Голдрыч: Я магу даць адказ толькі са спасылкай на афіцыйную заяву Дзярждэпартамента пра тое, што вызваленне Алеся Бяляцкага — гэта палітычны крок, але неабходна вызваліць усіх палітзняволеных. Толькі калі будуць вызваленыя ўсе палітвязні можна казаць пра пачатак шляху да паляпшэння ўзаемаадносінаў.

Еўрарадыё: Вядома, што беларускія ўлады далі дазвол на тое, каб колькасць супрацоўнікаў амбасады ЗША павялічылася на аднаго чалавека. Вядома і тое, што ён будзе займацца візавымі пытаннямі. Калі новы супрацоўнік прыедзе і ці чакаць палёгкі з амерыканскімі візамі?

Ітан Голдрыч: Новы супрацоўнік візавага аддзела прыедзе ў ліпені. Гэта будзе шосты амерыканскі супрацоўнік у амбасадзе ЗША ў Беларусі. Мы чакаем, што пасля яго прыезду консульскі аддзел зможа пашырыць свае функцыі і прадстаўляць больш консульскіх паслуг. Але мы зможам даць інфармацыю пра тое, якія менавіта паслугі будуць аказвацца нашым візавым аддзелам у Беларусі толькі праз некалькі тыдняў. Консульскі аддзел не зможа ў поўным маштабе выконваць свае функцыі, але мы іх пашырым. Праўда, дакладнае апісанне новых функцый будзе прадстаўленае пазней.

Еўрарадыё: На пачатку сваёй працы ў Беларусі вы казалі, што будзеце вывучаць беларускую мову. Як поспехі?

Ітан Голдрыч: Я вучыў беларускую мову і вывучыў некаторыя фразы, нават некаторыя вершы, але не здолеў навучыцца свабодна размаўляць. Гэта вельмі прыгожая мова і мне вельмі падабалася яе вывучаць!

Еўрарадыё: Дык, можа, верш па-беларуску прачытаеце?

Ітан Голдрыч: Я вучыў “Зорка Венера”, але па шчырасці, апошні раз чытаў яго некалькі месяцаў таму і цяпер, вось так знянацку, магу прыгадаць толькі фразу: “Зорка Венера ўзышла над зямлёю”!

Еўрарадыё: За два гады працы ў Беларусі вы дамагліся новага памяшкання для адзела адукацыі, культуры і інфармацыі, павялічэння штату супрацоўнікаў на аднаго чалавека… А што з запланаванага выканаць не ўдалося?

Ітан Голдрыч: Вызваленне ўсіх палітычных зняволеных — гэта тое, чаго не адбылося за час маёй працы ў Беларусі. Але ў мінулую суботу мы сталі сведкамі вызвалення Алеся Бяляцкага, і гэта вельмі прыемная навіна, прыемная падзея здарылася літаральна за некалькі дзён да майго ад’езду. Было б выдатна, каб і ўсе астатнія былі вызваленыя, але за гэтым назіраць і гэтых навінаў чакаць давядзецца мне напэўна ўжо з новага месца працы, з Абу-Дабі, дзе я буду працаваць намеснікам кіраўніка мясцовага дыппрадстаўніцтва ЗША.

Як стала вядома Еўрарадыё, з Беларусі Ітан Голдрыч з’едзе цягам бягучага тыдня. А яшчэ праз тыдзень у Мінск прыедзе новы Часовы павераны ў справах ЗША ў Беларусі Скот Роланд (Scott Rauland).
 

Фота Змітра Лукашука