Зафіксавана рэзкае павелічэнне паставак у РБ з акупаваных тэрыторый Украіны
У Беларусь прывозяць пракат металаў і вырабы з яго (ілюстрацыйнае фота) / pixabay.com
Зафіксавана рэзкае павелічэнне паставак у Беларусь з акупаваных Расіяй тэрыторый Украіны — з 10 тысяч тон за 2020-2023 гады да больш за 25 тысяч тон за дзевяць месяцаў гэтага года (у 2,5 разы перавышаюць аб'ёмы за папярэднія чатыры гады разам узятыя), піша belzhd.com.
У 2024-м змяніўся склад асноўных грузаў. Раней большая частка паставак прыпадала на вугальныя руды і спадарожныя грузы. Цяпер жа гэта пракат металаў і вырабы з яго. Пастаўкі здзяйсняюцца ў асноўным па чыгунцы. Фактычным (афіцыйным) і адзіным адпраўніком усіх грузаў у РБ з'яўляецца ТАА "ФЛОРАНС", якое зарэгістраванае ў Маскве.
Грузы з акупаваных тэрыторый атрымалі 14 беларускіх прадпрыемстваў. Сярод іх — БелАЗ, МАЗ, "Керамін", Асіповіцкі завод транспартнага машынабудавання, "Магілёўтрансмаш".
