Каля медыцынскіх цэнтраў у Мінску — вялізныя чэргі на здачу ПЛР-тэста

У Мінску раніцай чытачы Еўрарадыё заўважылі велізарную чаргу ля медыцынскага цэнтра Synevo, што на праспекце Незалежнасці. Тэст патрэбны для выезду за мяжу.

— Побач з гэтым пунктам адкрылі яшчэ адзін, дзе таксама можна здаць тэст. Чарга на відэа — гэта ўжо пасля таго, як многія разышліся, — расказаў слухач Еўрарадыё.

У даведцы медыцынскага цэнтра адзначылі, што сёння працуе толькі адзін пункт здачы тэста Synevo, магчыма, з гэтай прычыны сабралася чарга. Усяго ж у будні ў Мінску тэст можна здаць у дзесяці лабараторыях медыцынскай сеткі. Каб пазбегнуць чакання, у даведцы параілі прыходзіць у будныя дні. Кошт тэста з вынікамі на англійскай мове — каля 73 рублёў.

Дадамо, што чытачы таксама паведамлялі пра невялікія чэргі каля лабараторыі "Інвітра" ва Уруччы.