Кіраўніцтва будаўнічай кампаніі на грошы кліентаў купляла сабе золата

Як інфармуе interfax.by, справа пачатая за крадзеж шляхам злоўжывання службовымі паўнамоцтвамі. Па звестках следчых, ад траўня 2009 года па сёлетні жнівень дырэктар кампаніі ў змове з яе заснавальнікамі забіралі сабе грошы ўдзельнікаў долевага будаўніцтва. Пацярпелымі сталі мінчукі, якія хацелі пабудаваць кватэры ў жылым комплексе "Самацветы" ў Фрунзенскім раёне сталіцы.

Дома ў падазраваных і ў офісах падкантрольных ім камерцыйных структур супрацоўнікі КДБ забралі каля 18 кг золата ў злітках Нацбанка. Таксама КДБ звяртае ўвагу, што ў падазраваных былі дарагія аб'екты нерухомасці і транспартныя сродкі. Падазраваных узялі пад варту.

Нагадаем, што пра карупцыю ў будаўнічай галіне ў чэрвені казаў кіраўнік Беларусі. Тады Аляксандр Лукашэнка запатрабаваў ад праваахоўных органаў адэкватных дзеянняў у гэтым напрамку.