Кіраўнік БЧК абурыўся, што рашэнне аб прыпыненні сяброўства было па-беларуску

Рашэнне Міжнароднай федэрацыі аб прыпыненні сяброўства Беларускага Чырвонага Крыжа было "абсалютна палітызаваным". Пра гэта заявіў генеральны сакратар БЧК Дзмітрый Шаўцоў.

У якасці доказу гэтага ён спаслаўся на тое, што рашэнне было апублікаванае... па-беларуску і па-ўкранску.

"Хоць афіцыйныя мовы Міжнароднай федэрацыі — англійская, французская, іспанская, арабская, тэхнічная мова — руская. Апублікаванне на ўкраінскай і беларускай мовах — ва ўгоду ўкраінскіх уладаў, якія заклікалі Шаўцова ў Міжнародны суд, і ва ўгоду беларускай апазіцыі, якая таксама крычала, што Шаўцоў удзельнічае ў дэпартацыі дзяцей з Данбаса", — перадае БЕЛТА словы Шаўцова.

Як распавядала Еўрарадыё, з 1 снежня Міжнародная федэрацыя таварыстваў Чырвонага Крыжа і Чырвонага Паўмесяца прыпыніла сяброўства беларускай арганізацыі. Гэта азначае адсутнасць фінансавання арганізацыі і няўдзел у міжнародных праграмах.

Міжнародная федэрацыя патрабавала адхіліць ад пасады Шаўцова, які ўдзельнічаў у вывазе ўкраінскіх дзяцей з акупаваных тэрыторый і сам наведваў Данбас у вопратцы з сімвалам Z. Аднак Беларускі Чырвоны Крыж наадварот пераабраў Шаўцова на новы тэрмін.