Корпус рэактара для другога энергаблока дастаўлены на Беларускую АЭС

Корпус рэактара для другога энергаблока прыбыў на Беларускую АЭС. Ніякіх здарэнняў па дарозе заўважана не было, таму можна меркаваць, што яго мантаж пачнецца да канца 2017 года, як і запланавана.

На першым энергаблоку корпус рэактара і ўсе чатыры парагенератары ўжо змантаваныя, паведамляе БелТА.

Гэта ўжо трэці корпус рэактара для БелАЭС, які дастаўляюць у Беларусь. Як паведамлялася раней, першы рэактар для першага энергаблока пры мантажы выранілі з вышыні некалькіх метраў. Таму яго вырашылі замяніць на іншы.

Другі корпус пры перавозцы чыгункай стукнулі аб слуп каля станцыі Слаўнае, аднак мяняць не сталі. Гэты корпус вырашылі паставіць на першы энергаблок Беларускай АЭС.

Рэактар уяўляе з сябе вертыкальны цыліндрычны корпус з эліптычных дном, усярэдзіне якога размяшчаецца актыўная зона і ўнутрыкорпусныя прылады. Зверху рэактар герметычна зачынены вечкам з усталяванымі на ім прывадамі механізмаў і органаў рэгулявання і абароны рэактараў і патрубкамі для вываду кабеляў датчыкаў унутрырэактарнага кантролю.

Беларуская АЭС будуецца недалёка ад Астраўца (Гродзенская вобласць) па тыпавым расійскім праекце АЭС-2006. Першапачаткова яна мусіла запрацаваць у 2017 годзе, але на гэты момант першы энергаблок плануецца ўвесці ў эксплуатацыю ў снежні 2019 года, другі — у 2020-м.