Лукашэнка: Гэта не тая Амерыка, якую я бачыў гадоў дзесяць таму
У панядзелак, 14 лістапада, падчас наведвання прадпрыемства "Магілёўхімвалакно" Аляксандр Лукашэнка пракаментаваў перамогу на прэзідэнцкіх выбарах у ЗША Дональда Трампа. Ён мяркуе, што прадстаўнік Рэспубліканскай партыі мае магчымасць вырашыць шэраг унутрыдзяржаўных праблем і ўвайсці ў гісторыю сваёй краіны.
"Ён можа патрапіць у гісторыю, калі сапраўды за час прэзідэнцтва страсяне Амерыку, — цытуе словы Лукашэнкі БЕЛТА. — Людзі былі даведзены да таго, што рабочы клас за яго прагаласаваў, нягледзячы на тое што ён багач. Гэта значыць ўнутры Амерыкі наспелі вельмі сур'ёзныя праблемы".
Аляксандр Лукашэнка адзначыў, што пэўны заняпад і апатыя ў Злучаных Штатах бачныя няўзброеным вокам. Кіраўнік дзяржавы прыгадаў мінулагоднюю паездку ў ЗША і выступленне ў ААН. У яго засталіся негатыўныя ўражанні ад таго, што ён пабачыў у Нью-Ёрку: найперш яго ўразіла недагледжаная тэрыторыя па шляху руху з аэрапорта.
"Гэта не тая Амерыка, якую я бачыў гадоў дзесяць таму назад. Людзі ж ацэньваюць стан спраў адразу, выходзячы з самалёта", — заявіў Аляксандр Лукашэнка. Адзначым, што перад візітам у 2015 годзе Лукашэнка наведваў ЗША ў 1995-м г. зн. 20 гадоў таму.
Кіраўнік Беларусі таксама прыгадаў, што ў Расіі радаваліся перамозе Трампа. Ён перакананы, што новы прэзідэнт ЗША будзе пераследаваць найперш амерыканскія інтарэсы і для Расіі ён таксама "не падарунак". Лукашэнка спадзяецца на прасоўванне беларуска-амерыканскага дыялогу. "У нас някепска пайшлі справы з амерыканцамі. Мы з імі ў кантакце, вядзем гэты дыялог, цалкам захоўваючы наш суверэнітэт і незалежнасць. Яны зразумелі, што больш пытанне"з Расіяй ці з Захадам" ставіць нельга", — сказаў беларускі лідар.
