Ля санаторыя Нацбанка не будзе свінакомплексу — каб не смярдзела
Ля санаторыя Нацбанка пад Ружанамі не будзе гаспадаркі па вырошчванні свіней — мясцовыя ўлады вырашылі, што гасцям установы непрыемна будзе чуць спецыфічныя пахі. Пра гэта піша газета “Раённыя будні”.
Паводле выдання, 11 кастрычніка ў райвыканкаме прайшлі грамадскія слуханні ў пытанні будаўніцтва свінакомплексу. Месцам яго ўзвядзення мусіла стаць пляцоўка ў 3100 метрах ад вёскі Малочкі і ў 4900 метрах ад санаторыя “Ружанскі” Нацыянальнага банка. Пастанавілі шукаць новае месца пад свінакомплекс.
Іншая пляцоўка знаходзіцца на значнай адлегласці ад адзараўленчай установы. Яе выбар таксама будуць абмяркоўваць на грамадскіх слуханнях.
