Маск ізноў самы багаты, а Мбапэ аказаўся невінаватым — #ІхНоравы

12/12/2024 - 15:25

Міжнародныя навіны / @rubanau_collage

На фоне перамогі Дональда Трампа на прэзідэнцкіх выбарах у ЗША багацце Ілана Маска вырасла да нечуваных $400 млрд. Ён стаў першым чалавекам у гісторыі з такім набыткам.

Пра гэта і не толькі чытайце ў нашым штодзённым аглядзе сусветных навін.

Ілан Маск стаў першым чалавекам у гісторыі, чыё багацце перавысіла $400 млрд

Заснавальнік SpaceX і Tesla Ілан Маск стаў першым чалавекам у гісторыі, багацце якога перавысіла $400 млрд. Паводле ацэнкі Bloomberg, капітал прадпрымальніка складае $439 млрд.

Набытак Маска ў канцы 2022 года скараціўся больш чым на $200 млрд, але значна вырас за апошнія месяцы на фоне перамогі Дональда Трампа на прэзідэнцкіх выбарах у ЗША. Прадпрымальнік аказваў яму актыўную падтрымку.

На перадвыбарчую кампанію Трампа Маск выдаткаваў больш за $250 млн. Пасля перамогі Трамп прызначыў бізнесоўца кіраўніком дэпартамента эфектыўнасці дзяржкіравання. Гэта новае падраздзяленне ва ўрадзе ЗША.

У той жа час акцыі Tesla, якая належыць Маску, выраслі прыкладна на 65% у параўнанні з паказчыкамі да выбараў у ЗША.

Іншая кампанія Маска, SpaceX, зараз ацэньваецца ў $350 млрд, што робіць яе самым дарагім стартапам у свеце.

Кожная 20-я смерць у Канадзе — эўтаназія

Улады Канады апублікавалі штогадовую справаздачу з моманту легалізацыі эўтаназіі. Так, у 2023 годзе добраахвотна пайсці з жыцця вырашыла больш за 15 тысяч жыхароў, што складае 4,7% смерцяў у краіне, паведамляе Бі-бі-сі.

Звесткі Міністэрства аховы здароўя паказваюць, што з моманту легалізацыі эўтаназіі ў 2016 годзе паслуга хутка набывае папулярнасць у краіне.

Маск снова самый богатый, а Мбаппе оказался невиновен — #ИхНравы

Эўтаназія вельмі папулярная ў Канадзе / nashvancouver.com

У справаздачы гаворыцца, што 96% жыхароў Канады, якія вырашылі добраахвотна пайсці з жыцця, мелі смяротную хваробу. Астатнім 4% эўтаназію дазволілі з-за наяўнасці працяглага хранічнага захворвання.

Сярэдні ўзрост такіх пацыентаў складае 77 гадоў. За паслугай часцей за ўсё звярталіся людзі, якія хварэлі на рак.

Канада ўваходзіць у лік нешматлікіх краін, якія за апошняе дзесяцігоддзе ўвялі закон аб эўтаназіі. У іх ліку таксама Аўстралія, Новая Зеландыя, Іспанія і Аўстрыя.

Рэкордную колькасць смерцяў ад наркотыкаў зарэгістравалі ў Германіі ў мінулым годзе

У 2023 годзе зарэгістравалі рэкордную колькасць смерцяў ад наркотыкаў у Германіі: 2227 чалавек памерлі пасля ўжывання забароненых рэчываў. Большасць з іх ужывалі больш за адзін небяспечны наркотык, піша BILD.

У 610 загінулых у крыві быў знойдзены крэк — небяспечнае рэчыва, якое атрымліваецца пры змешванні какаіну з вадой і содай або аміякам. Атрыманы такім чынам крэк звычайна кураць. Ён выклікае моцнае прывыканне, наносіць сур'ёзную шкоду здароўю і таннейшы за какаін. На цяперашні момант крэк амаль такі ж самы небяспечны, як гераін, які прывёў да 712 смяротных выпадкаў.

Упаўнаважаны ўрада Германіі па пытаннях наркотыкаў Буркхард Блінэрт заявіў: "Ужыванне крэка ў буйных нямецкіх гарадах становіцца ўсё большай праблемай — як для здароўя, так і для грамадскага парадку. Спажыўцоў няшмат, але іх становішча вельмі цяжкае".

Таксама Блінэрт адзначыў неабходнасць выдзялення большага фінансавання на навуковыя даследаванні і пашырэння паўнамоцтваў для ўпаўнаважанага па пытаннях наркотыкаў.

Пракуратура Швецыі закрыла справу Кіліяна Мбапэ. Футбаліста падазравалі ў згвалтаванні

Шведская пракуратура спыніла расследаванне ў дачыненні да французскага футбаліста, нападніка мадрыдскага "Рэала" Кіліяна Мбапэ. Пра гэта паведамляецца ў прэс-рэлізе пракуратуры.

"Расследаванне па падазрэнні ў згвалтаванні і двух выпадках сексуальнага гвалту ў гатэлі ў цэнтры Стакгольма 10 кастрычніка 2024 года закрытае", — гаворыцца ў паведамленні. Паводле ацэнкі старшага пракурора Марыны Чыраковай, у справе недастаткова доказаў для працягвання следства.