Дактары, навукоўцы, выкладчыкі: каго Лукашэнка вінаваціць у праблемах Беларусі

12/12/2024 - 14:03

У праблемах Беларусі вінаватыя нават прапагандысты

У праблемах Беларусі вінаватыя нават прапагандысты / dsnews.ua

Беларуская прапаганда не перастае трубіць пра тое, як добра і стабільна жыць пры рэжыме Лукашэнкі. Калі ён, не дай Бог, адыдзе, у краіне наступіць поўны бардак, пастаянна нагадваюць нам праўладныя тэлеграм-каналы.

Тым часам сам Лукашэнка жыццём у Беларусі відавочна незадаволены. Мяркуючы з яго сістэматычнай крытыкі ў адрас працаўнікоў медыцыны, адукацыі, культуры і многіх іншых сфер, бардак у Беларусі наступіў менавіта пры ім. Ну а вінаватыя, як заўсёды, вядома ж, усе вакол, толькі не ён.

Перагледзеўшы некаторыя выступы Лукашэнкі за 2024 год, Еўрарадыё высветліла, што канкрэтна яго не задавальняе ў яго ж уласнай сістэме і каго ён у гэтым абвінавачвае.

Не кінематограф, а ганьба!

— З усіх мастацтваў для нас найважнейшым з'яўляецца кіно. І тое, што адбываецца ў нашым кінематографе — гэта проста ганьба, — заявіў Лукашэнка, прызначаючы новым міністрам культуры актора Руслана Чарнецкага. — Гэта недапушчальна. Мы скаціліся, мы сталі горш выглядаць да таго савецкага перыяду, калі надавалі сур'ёзную ўвагу кінематографу. Не скажу, што мы ў гэтым не зацікаўленыя, але чамусьці ўсе хочуць мець грошы, але на выхадзе не хочуць пагадзіцца з тым, што трэба мець добры фільм, карціну добрую. Звярніце на гэта самую сур'ёзную ўвагу.

У недахопе медыкаў вінаватыя самі дактары

У красавіку падчас рабочай паездкі ў Гродна Лукашэнка вельмі своеасабліва пракаментаваў сітуацыю з недахопам медыцынскіх работнікаў. У гэтым вінаватыя самі дактары.

Врачи, учёные, преподаватели: кого ещё Лукашенко винит в проблемах Беларуси

Калі вінаватыя ўсе, але толькі не сам Лукашэнка / @rubanau_collage

У тым, што моладзь не хоча вучыцца ў Беларусі, вінаватыя ідэолагі і выкладчыкі

Яшчэ ў лютым гэтага года, кажучы пра адукацыю ў Беларусі, Лукашэнка раскрытыкаваў ідэалагічную і выхаваўчую працу з моладдзю.

— Скажу проста: вы першыя адказваеце за нацыянальную бяспеку і несяце адказнасць за захаванне суверэнітэту краіны.

Ён заявіў, што самі выкладчыкі не заўсёды патрыёты, чаго тады патрабаваць ад студэнтаў.

Нагадваючы, што дзяржава ўкладае велізарныя грошы ў сістэму адукацыі, Лукашэнка падкрэсліў:

— Падрыхтоўка няпрофільных спецыялістаў, нізкая замацоўвальнасць на першым працоўным месцы, адыход з прафесіі — гэта недазваляльная раскоша для нашай дзяржавы.

Ніхто не забыў, як у 2020 годзе Лукашэнка адпраўляў за краты студэнтаў і выкладчыкаў, якія выступалі супраць гвалту ў Беларусі. Пасля гэтага моладзь прадказальна пачала "звальваць" за мяжу. Разам з ёй з'ехалі і многія педагогі.

Праз чатыры гады, замест таго каб задаць пытанне сабе самому, Лукашэнка патрабуе растлумачыць сітуацыю ад адміністрацый універсітэтаў.

Відаць, дыктатар сур'ёзна не можа зразумець, як выйшла, што замест БДУ, БНТУ, БДУІР, медуніверсітэтаў і іншых вядучых ВНУ Беларусі наша моладзь выбірае замежныя.

У сельскай гаспадарцы ўсё так дрэнна, што патрэбныя рэпрэсіі

У красавіку 2024-га Лукашэнка запатрабаваў ад губернатараў рэгіёнаў палепшыць сітуацыю ў сельскай гаспадарцы.

— Не будзе выніку сёлета — чакайце самых жорсткіх рэпрэсій, — прыгразіў ён.

Напрыклад, гаворачы пра Віцебскую вобласць, Лукашэнка заўважыў, што пакуль не атрыманая жаданая аддача ад стварэння тут аграпрамысловых аб'яднанняў. Ён таксама падкрэсліў, што па-ранейшаму ўсплываюць факты крадзяжу паліва.

Таксама кіраўнік Беларусі закрануў пытанне дысцыпліны, у тым ліку пры забеспячэнні захаванасці жывёлы.

— Узгадняючы прызначэнні старшыняў райвыканкамаў, я заўсёды кажу: "Хлопцы, патрэбны вынік! Калі не хочаце ваяваць, патрэбны вынік на зямлі!”

Прастой і скарачэнне экспарту трактароў і халадзільнікаў

Гаворачы пра прамысловасць, Лукашэнка ўвесь час нешта крытыкуе. Напрыклад, у красавіку ён раскрытыкаваў сітуацыю адразу на некалькіх нашых "найлепшых" заводах.

— Мне дакладаюць, што сёння айчынная прадукцыя саступае аналагам як паводле цаны, так і паводле якасці. Паводле цаны яшчэ вытлумачальна. Але чаму паводле якасці?

Экспарт беларускіх трактароў у 2023 годзе скараціўся на 18%. Доля нашых трактароў у расійскім імпарце знізілася да мінімальных за апошняе дзесяцігоддзе 10,5%, грузавых аўтамабіляў — да 6%.

Паводле Лукашэнкі, такія пагрозлівыя тэндэнцыі ёсць і на "Атланце": аб'ёмы экспарту халадзільнікаў і маразільнікаў скараціліся амаль удвая.

— Дайшлі да таго, што сістэматычна ўзнікаюць прастоі, а людзей адпраўляюць у вымушаныя адпачынкі. Мы страчваем рынак. Чаму?

У чэрвені пад разнос Лукашэнкі трапіла праца пялетных заводаў:

— Мы можам вырабляць, паслухайце толькі, мільён тонаў пялет, мільён тонаў у год. Нямала інвестыцый уклалі. Як дзяржаўныя, так і прыватныя. Але сёння, у сілу вядомых вонкавых абставінаў, пялетная вытворчасць працуе так-сяк. Растуць запасы нізкагатунковай драўніны, дзелавой драўніны. Гэта значыць, у лесе гніе рэсурс. Пры гэтым захады, якія робяцца ўрадам, шчыра кажучы, выніку не далі, — прызнаў паразу кіраўнік Беларусі.

У снежні Лукашэнка наведаў Аршанскі інструментальны завод і застаўся вельмі незадаволены.

— Не любіце Вы людзей, не любіце вы завод. Калі ўжо робіце тут нейкую паказуху, зрабіце бардзюр, але навошта ў траву класці асфальт? Гэта што, культура? Вось за гэта чыноўнікаў і ненавідзіць часам народ — за вашы безадказнасць і бязладдзе, — сказаў ён.

— Пакуль двойка з мінусам, і да цябе прэтэнзій мора. Ніколі не займайся ашуканствам. Ты — малады кіраўнік. Ты тут галоўны. Не дай бог я перад новым годам прыеду, і маё вока зачэпіцца дзесьці за нешта. Ты ведаеш, што будзе, — прыгразіў Лукашэнка дырэктару завода Уладзіславу Бардзюкову.

Запатрабаваў не ствараць у СМІ "паралельныя светы"

Прапагандысты не перастаюць трубіць пра тое, як добра і стабільна жыць у Беларусі пры Лукашэнку.

Гэта дзіўна, але нават ім не ўдалося пазбегнуць у 2024 годзе яго жорсткай крытыкі.

— Ніколі не патрабаваў фільтраваць інфармацыю, ствараючы ў СМІ "паралельныя светы" ўсеагульнага дабрабыту і замоўчваючы вострыя тэмы, — падкрэсліў кіраўнік краіны, выступаючы на Форуме медыйнай супольнасці Беларусі ў траўні. — Мой падыход вы ведаеце: людзі павінны бачыць і ведаць праўду. А некаму карысна і рабіць высновы.

Чаму кіраўнікі прапагандысцкіх медыя высноў не робяць, зразумець не цяжка.

Паставіўшы перад імі задачу "казаць праўду і нічога, акрамя праўды", Лукашэнка дадае, што рабіць гэта неабходна "без крытыканства", "па-дзелавому" і "каб быў эфект".