Гарачая падборка "геніяльных" рэформаў адукацыі за часамі Лукашэнкі

27/11/2024 - 12:12

Рэформы адукацыі за Лукашэнкам / @rubanau_collage

Аляксандр Лукашэнка актыўна выкарыстоўвае тэму адукацыі ў сваёй кампаніі, наведваючы беларускія ВНУ і дэманструючы клопат пра моладзь.

Аднак амаль за тры дзесяцігоддзі яго кіравання сістэма адукацыі зведала мноства спрэчных рэформаў і эксперыментаў.

Еўрарадыё ўспамінае, якія ініцыятывы Лукашэнка і яго чыноўнікі рэалізоўвалі ў школах і ВНУ і якія гучныя прапановы рэформаў гучалі за гэты час.

Лукашэнка супраць рэформаў у адукацыі: Трэба даць нармальныя падручнікі школам

Перанёс пачатак навучальнага дня "пад Колю"

— Спачатку Лукашэнка загадаў перапісаць падручнікі, бо ягоны сын не ўспрымае зместу некаторых з іх. Цяпер пад Колю пераносяць пачатак навучальнага дня. А што потым? Пад Колю перапішуць Канстытуцыю?

Так некаторыя бацькі адрэагавалі на ініцыятыву Лукашэнкі перанесці пачатак урокаў на дзевяць гадзін раніцы ў 2017 годзе. Кіраўнік Беларусі патлумачыў гэта тым, што дзеці не высыпаюцца, спаслаўшыся на малодшага сына Мікалая, на той момант 13-гадовага падлетка.

— Я пытаю: што ты рабіў на першым уроку? — "Усе спяць, ну, і я трохі падрамаў", — працытаваў свой дыялог з сынам Лукашэнка.

Пасля гэтага чыноўнікі сапраўды перасунулі графік заняткаў на гадзіну наперад.

Ухваліў, а потым адмяніў 12-годку

Дарэчы, умешвацца ў навучальны працэс Лукашэнка стаў задоўга да таго, як Коля пачаў вучыць першыя літары.

Горячая подборка “гениальных” реформ образования при Лукашенко

Школьныя гады Колі Лукашэнкі / ТАСС

Адмяніў профільную адукацыю ў школах

Першага верасня 2008 года сістэма сярэдняй адукацыі вярнулася да 11-гадовага навучання. Паралельна з гэтым у агульнаадукацыйных школах закрылі класы профільнага навучання і класы з паглыбленым вывучэннем прадметаў.

Лукашэнка абавязаў усе дзіцячыя садкі і школы ў Беларусі атрымаць ліцэнзіі / telegraf.news

Адмяніў "завочку" для ўсіх

Доўгія гады атрымліваць вышэйшую завочную адукацыю маглі ўсе ахвочыя, незалежна ад таго, працуюць яны па прафесіі ці не. Гэта было зручна, асабліва калі абітурыент не прайшоў на дзённы бюджэт, а вучыцца на платным не дазвалялі фінансы.

— Трэба, каб завочную адукацыю атрымлівалі тыя, каму гэта патрэбна і хто нам патрэбны — дзяржаве і эканоміцы, — сказаў Лукашэнка.

У выніку быў прыняты новы закон, згодна з якім паступіць на завочную форму навучання маглі толькі абітурыенты, якія прапрацавалі па абранай спецыяльнасці не менш за дзесяць месяцаў. То-бок падзарабляючы афіцыянтам у кавярні, атрымаць вышэйшую ветэрынарную адукацыю ўжо не атрымаецца.

Сказаў, што МДЛУ трэба перайменаваць, а фразу "Раздзявайся і працуй" — перакласці на кітайскую мову

Лукашэнка лічыць, што цяперашняя назва Лінгвістычнага ўніверсітэта выглядае як нецэнзурная лаянка.

— Быў іняз. Чаму мацюкальным словам ВНУ абазвалі?! — абурыўся ён, наведваючы навучальную ўстанову.

Адказваючы на пытанне адміністрацыі ВНУ, якой ён бачыць перспектыву Лінгвістычнага ўніверсітэта праз 25 гадоў, Лукашэнка адказаў:

— Думаю, ён стане інязам, — і дадаў: — Але я не прадказальнік. Будзем з гэтага зыходзіць у нашай размове.

Дарэчы, падчас сустрэчы са студэнтамі МДЛУ Лукашэнку спыталі, як бы ён паставіўся да выдання навучальнага дапаможніка для студэнтаў-перакладчыкаў, заснаванага на тэкстах ягоных выступаў.

Лукашэнка нагадаў, што кніжачкі з яго (і не толькі яго) цытатамі ўжо існуюць, але наогул "важдзізму быць не мусіць".

І тут жа сказаў, што быў бы не супраць, калі б студэнты пераклалі на кітайскую яго любімыя фразы "Раздзявайся і працуй" або "Будзе вельмі цікава".

Іерогліфы можна было б размясціць на майках. Футболкі з такімі прынтамі на рускай мове Лукашэнка, вядома ж, бачыў.

Прапанаваў адпраўляць студэнтаў у войска на вакацыях

— Сёння дзяўчына хоча, каб побач з ёю быў мужык, а не проста хтосьці там у штанах хадзіў, — сказаў кіраўнік Беларусі ў кастрычніку 2018 года.

Разважаючы пра тое, як "зрабіць мужыкамі" студэнтаў, якія любым спосабам хочуць адкасіць ад войска пасля заканчэння навучання, Лукашэнка прыйшоў да высновы, што можна адпраўляць іх у войска "на пару месяцаў" на летніх вакацыях.

— Мужык мксіць умець размаўляць са зброяй, — растлумачыў ён. — У адваротным выпадку ён не зможа абараніць сваю сям'ю, сваё дзіця, жонку, маці. Гэта ж наша функцыя — абараняць і памерці дзеля жанчыны. Так было заўсёды.

Аднак ён звярнуў увагу, што гэта ўсяго толькі адзін з магчымых спосабаў вырашэння праблемы, і пакуль не стаў прымаць такое радыкальнае рашэнне.

Прапанаваў увесці абавязковую паслядыпломную адпрацоўку (у тым ліку для студэнтаў-платнікаў) і павялічыць яе тэрмін

На думку Лукашэнкі, два гады адпрацоўкі для бюджэтнікаў і пяць для мэтавікоў — замала. Акрамя таго, платная адукацыя ў Беларусі — гэта "капейкі", таму ён лічыць, што добра было б увесці абавязковую паслядыпломную адпрацоўку і для студэнтаў-платнікаў. З такой прапановай ён выступіў у верасні 2023 года.

Дарэчы, яшчэ ў 2021 годзе кіраўніка Беларусі вельмі абурала масавая эміграцыя дактароў: маўляў, спецыялістаў вучаць на радзіме, а потым яны з'язджаюць за мяжу.

Каб змяніць сітуацыю, ён прыгразіў увесці дзесяць гадоў абавязковай адпрацоўкі для выпускнікоў беларускіх медыцынскіх ВНУ, якія вучыліся на бюджэтнай аснове. На яго думку, такая мера дапаможа справіцца з цякучкай кадраў у медыцыне.

Прапанаваў студэнтам жыць "бядней"

— Лепш жыць бядней, чым ваяваць, — сказаў Лукашэнка падчас вераснёўскай сустрэчы са студэнтамі Віцебскага дзяржаўнага ўніверсітэта. Ён заклікаў іх паскорыць навукова-тэхнічную рэвалюцыю, пакуль Беларусь "не ўцягнулі ў ваеннае супрацьстаянне".

Кіраўнік Беларусі таксама адзначыў, што наша краіна развіваецца ва ўмовах санкцый, і заявіў, што толькі плённая праца кожнага грамадзяніна дапаможа развіццю Беларусі ў будучыні.

Таксама ён параіў маладым людзям у рэгіёнах не імкнуцца ў Мінск.

Заклікаў атрымліваць адукацыю менавіта ў Беларусі

Пасля пратэстаў 2020 года многія студэнты, якія бралі ў іх удзел, трапілі за краты. Некаторыя кінулі ўніверсітэты і з'ехалі вучыцца ў Еўропу.

Размаўляючы са студэнтамі гуманітарных ВНУ, Лукашэнка паспрабаваў матываваць моладзь заставацца ў Беларусі.

Зрабіў ён гэта, мякка кажучы, не вельмі аптымістычна:

— Чужы хлеб заўсёды горкі. Гэта не я прыдумаў. Таму жывіце ў сябе, атрымлівайце тут адукацыю. Адукацыя нармальная, калі вы хочаце вучыцца.
У нас людзі ад прыроды разумныя. Займайцеся, не спяшайцеся кудысьці. І будзьце гатовыя, што ў вас адразу можа нічога не атрымацца. І, хутчэй за ўсё, не атрымаецца. Трэба цярпець. Бог убачыць — дапаможа.