"Прэзідэнцкая падтрымка стварае адчуванне прадузятасці. Адчуванне адсутнасці незалежнасці. Спыніць яе — прынцыповае рашэнне, і яно правільнае", — піша ён у сваёй калонцы для "Пост".
І ўсё адно гэтае рашэнне справакавала шквал незадаволенасці. І звонку — чытачы разлічвалі, што "Пост" падтрымае Камалу Харыс. І ўнутры — кажуць, частка калектыву фрустраваная гэтым рашэннем. Тры чальцы рэдакцыйнай калегіі падалі ў адстаўку, а тысячы чытачоў адмянілі падпіску на газету.
"Мы ўсведамляем, што гэта будзе вытлумачана па-рознаму, у тым ліку як маўклівае ўхваленне аднаго кандыдата, ці як асуджэнне іншага, ці як адмова ад адказнасці. Гэта непазбежна, — сказаў выдавец "Пост" Уіл Льюіс. — Мы не бачым гэта такім чынам. Мы лічым, што гэта адпавядае каштоўнасцям, якія The Post заўсёды адстойваў".
Дастаўка гуманітаркі ў сектар Газа будзе складанейшай
Парламент Тэль-Авіва прагаласаваў за забарону агенцтву ААН па справах бежанцаў (UNRWA) працаваць на тэрыторыі Ізраіля і акупаванага Ізраілем Усходняга Ерусаліма. Забарона можа працягнуцца тры месяцы. Гэтае агенцтва — галоўная арганізацыя ААН, якая працуе на тэрыторыі Газы і пастаўляе гуманітарку.
Амаль усё насельніцтва анклава — а гэта больш за два мільёны чалавек — залежыць ад дапамогі і паслуг агенцтва. Прэм'ер Ізраіля Беньямін Нетаньяху сказаў, што гатовы працаваць з міжнароднымі партнёрамі, каб гарантаваць аказанне гуманітарнай дапамогі цывільнаму насельніцтву ў Газе.
Ізраіль дзесяцігоддзямі выступаў супраць UNRWA, але ў апошнія гады гэта супрацьдзеянне ўзмацнілася. Тэль-Авіў сцвярджае, што супрацоўнікі UNRWA ўступілі ў змову з ХАМАС у сектары Газа, а 19 супрацоўнікаў UNRWA нібыта бралі ўдзел у нападах 7 кастрычніка. ААН расследавала заяву Ізраіля і звольніла дзевяць абвінавачаных. Але заявіла, што доказаў па іншых абвінавачваннях Ізраіль не падаў.
Для UNRWA важна падтрымліваць кантакты з ізраільскімі вайскоўцамі, якія кантралююць усе пераходы ў Газу. Так яны атрымліваюць магчымасць дастаўляць гуманітарныя грузы на ахопленую вайной тэрыторыю.
Генеральны сакратар ААН Антоніу Гутэрыш заявіў, што рэалізацыя гэтых законаў "нанясе шкоду ўрэгуляванню ізраільска-палестынскага канфлікту, а таксама міру і бяспекі ў рэгіёне ў цэлым". Кіраўнік UNRWA Філіпе Лазарыні заявіў, што гэтае рашэнне "толькі пагоршыць пакуты палестынцаў".
Шэраг краін, у тым ліку ЗША, Вялікабрытанія і Германія, выказалі сур'ёзную занепакоенасць гэтым крокам.
Невядомы вальс Шапэна
Партытуру на картцы з напісаным ад рукі імем Шапэна знайшлі ў сховішчы Бібліятэкі і музея Моргана ў Нью-Ёрку. Яна была напісаная амаль 200 гадоў таму.
Куратар Робінсан Маклелан знайшоў твор яшчэ ўвесну, але спачатку не быў упэўнены, што гэта і праўда Шапэн. Ён сфатаграфаваў партытуру і сыграў яе дома. А потым пракансультаваўся з навукоўцам з Пенсільванскага ўніверсітэта, які з'яўляецца экспертам па Шапэну. Пасля гэтага атрамант і паперу адправілі на экспертызу — і так, вальс сапраўды належыць Шапэну.
Почырк на партытуры супадае з почыркам Шапэна. Сумневаў няма.
У музеі мяркуюць, што гэты вальс быў напісаны паміж 1830 і 1835 гадамі, калі Шапэну было крыху больш за 20 гадоў. Мелодыя адрозніваецца рэзкім пачаткам і, паводле піяніста Ланга Ланга, утрымлівае ў сабе "драматычную цемру, якая ператвараецца ў пазітыў".
