Мілінкевіча запрасілі на турнір па грэка-рымскай барацьбе ў Віцебску (фота)

Сёння ў Віцебску распачаўся міжнародны турнір па грэка-рымскай барацьбе на прызы Ігара Каныгіна. Славуты віцебскі барэц быў чэмпіёнам свету, тройчы Еўропы, Савецкага саюза і срэбным прызёрам Алімпіяды ў Маскве.

На адкрыцці турніру спартсменаў ды гледачоў чакаў сюрпрыз. Сярод афіцыйных асобаў знаходзіўся Аляксандр Мілінкевіч.

На турнір ён прыехаў па асабістаму запрашэнню Ігара Каныгіна. Апазіцыйны лідэр распавёў, што з'яўляецца прыхільнікам грэка-рымскай барацьбы і з павагай ставіцца да гаспадара турніру Ігара Каныгіна.

На мерапрыемствы такога кшталту ў якасці "вясельнага генерала" Мілінкевіча запрасілі ўпершыню. Паводле слоў экс-кандыдата ў прэзідэнты, ад'язджаў ён у такой спешцы, што нават забыўся на спецыяльны прыз для юных спартсменаў. Але абяцаў прывезці спецпрыз наступным разам.

Міжнародны турнір па грэка-рымскай барацьбе для юнакоў да 20 гадоў на прызы Ігара Каныгіна ў Віцебску ладзяць ўжо дванаццаты раз. Сёлета, акрамя беларускіх спартсменаў, ў ім бяруць ўдзел літоўцы.

Расіяне ды украінцы, паводле арганізатараў турніру, адмовіліся ад ўдзелу ў апошні момант — не здолелі знайсці грошы на паездку. Турнір будзе доўжыцца тры дні. Мілінкевіч з'ехаў з Віцебску неўзабаве пасля адкрыцця, крыху паназіраўшы за спаборніцтвамі.

Ядвіга Сташэўская, Еўрарадыё, Віцебск



Аляксандр Мілінкевіч і Ігар Каныгін



Падчас афіцыйнай цырымоніі адкрыцця