Мінчанка памерла пасля таго, як прышчапілася вакцынай "Спадарожнік V"

3 чэрвеня ў адной з мінскіх бальніц памерла 70-гадовая Антаніна Ч. Напярэдадні жанчына прышчапілася вакцынай "Спадарожнік V". Калега загінулай мінчанкі расказала Еўрарадыё, што жанчыне стала дрэнна неўзабаве пасля таго, як яна атрымала дозу расійскай вакцыны.

На машыне хуткай дапамогі Антаніну Ч. аператыўна адвезлі ў бальніцу. Аднак лекары не змаглі выратаваць жанчыну. Сваякі бачаць сувязь паміж яе смерцю і прышчэпкай. Але медыцынскіх заключэнняў на гэты конт пакуль што няма.

Адказваючы 4 чэрвеня на пытанні на пленарным пасяджэнні Санкт-Пецярбургскага эканамічнага форуму, Уладзімір Пуцін заявіў, што не зафіксавана ніводнай смерці, звязанай з выкарыстаннем "Спадарожніка V":

— ...Паводле звестак нашых кантрольных органаў, няма ніводнага лятальнага канца ад прымянення вакцыны, — цытуе Пуціна "Первый канал".

Еўрарадыё выказвае спачуванні родным і калегам памерлай.