Міністр інфармацыі запрасіў старшыню БАЖ на сустрэчу
Беларуская асацыяцыя журналістаў двойчы за апошні час звярталася ў Міністэрства інфармацыі з прапановай зладзіць сустрэчу з міністрам. Асноўная тэма — змены ў закон “Аб СМІ”, якія рыхтуюць адпаведныя дзяржаўныя органы, кажа Еўрарадыё старшыня БАЖ Андрэй Бастунец.
Бастунец: “Самае галоўнае, чаму мы звярталіся двойчы ў Мінінфарм: былі заявы міністра пра тое, што рыхтуюцца змены, нават прагучала — новая рэдакцыя закона, у закон “Аб СМІ”. Мы хацелі б абмеркаваць тое, у якім кірунку гэтыя змены пойдуць, і заклікаць, каб абмеркаванне магчымых зменаў адбывалася галосна, з прыцягненнем да працэсу грамадскасці. Каб меркаванне грамадскасці наконт прапанаваных зменаў было ўлічанае. Ну і, зразумела, мы не можам пакінуць па-за ўвагай іншыя пытанні, звязаныя з дзейнасцю СМІ, блакаванне інтэрнэт-рэсурсаў, да прыкладу”.
Апроч таго, кажа Андрэй Бастунец, БАЖ гатовы прапанаваць Мінінфарму дапамогу сваіх юрыстаў у падрыхтоўцы любых іншых дакументаў ці праектаў, звязаных з дзейнасцю СМІ.
