Мінскую краму, дзе пакупнік пабачыў пацука, зачынялі на прафілактыку
Пацук, ілюстрацыйнае фота / pixabay.com
У Мінску ў адной з сеткавых крамаў на вуліцы Казінца пакупнік пабачыў пацука. Відэа завірусілася ў TikTok на пачатку красавіка. Па словах пакупніка, велічыня жывёлы дасягала 20 сантыметраў.
У каментары "Мінск-Навінам" спецыялісты Мінскага гарадскога цэнтра гігіены і эпідэміялогіі патлумачылі, што ў краме перыядычна праводзяцца прафілактычныя дэратызацыйныя працы — грызуноў труцяць. Для гэтага выкарыстоўваюць таксічны сродак з назапашвальным эфектам. "Гэтае рэчыва выклікае ў грызуноў смагу. У пошуках вады яны пакідаюць месцы сваіх хованак і могуць з'явіцца нават у людных месцах, што і адбылося ў краме на вуліцы Казінца", — кажуць эпідэміёлагі.
1 красавіка дзейнасць крамы прыпынілі. Там правялі санітарна-тэхнічныя і дэратызацыйныя мерапрыемствы.
І ўжо 5 красавіка санстанцыя дазволіла краме аднавіць працу.
