Міжнародная федэрацыя каноэ не захацела плаціць Беларусі 500 тысяч долараў
Міжнародная федэрацыя каноэ не захацела плаціць Беларусі 500 тысяч долараў. Гэта мусіла быць кампенсацыя за дыскваліфікацыю шэрагу беларускіх спартсменаў перад Алімпіядай у Рыа ў 2016 годзе. Атрымаўшы з Беларусі патрабаванне аб выплаце кампенсацыі, міжнародная федэрацыя каноэ заявіла, што згодная заплаціць Беларускай асацыяцыі каноэ толькі 8 тысяч еўра, у адпаведнасці з рашэннем Спартыўнага суда ў Лазане. Іншых плацяжоў не будзе.
Міжнародная федэрацыя каноэ і зараз лічыць, што “была ўпаўнаважаная дыскваліфікаваць Беларусь пасля мноства допінгавых парушэнняў, зафіксаваных падчас збораў у Францыі перад Алімпійскімі гульнямі ў Рыа-дэ-Жанейра”. “Прессбол” нагадвае, што ў студзені 2017 года міжнародны арбітражны спартыўны суд зняў з мужчынскай зборнай Беларусі па веславанні на байдарках і каноэ аднагадовую дыскваліфікацыю, якую летась наклала згаданая міжнародная федэрацыя з-за падазрэнняў у парушэнні антыдопінгавых правілаў.
Дарэчы, як інфармуе БЕЛТА, у аўторак генеральны сакратар Нацыянальнага алімпійскага камітэта Беларусі Анатоль Котаў заявіў, што НАК накіраваў ад імя спартсменаў і міністэрства спорту і турызму прэтэнзію да міжнароднай федэрацыі каноэ “з просьбай кампенсаваць усе выдаткі і маральныя страты”. Калі станоўчага адказу не будзе, беларускі бок звернецца ў міжнародныя суды. Як бачым, міжнародная федэрацыя плаціць кампенсацыю ў памеры 400-500 тысяч долараў не збіраецца (у згаданую суму былі ўключаны прызавыя, якія мусілі атрымаць спартсмены ў выпадку перамогі, а таксама выдаткі на падрыхтоўку каманды).
