МУС Літвы скасоўвае дамову аб супрацоўніцтве з МУС Беларусі
Агне Білатайтэ / delfi.lt
МУС Літвы скасоўвае дамову аб супрацоўніцтве з МУС Беларусі, паведамляе Delfi. Дакумент быў падпісаны ў 1993 годзе. Па словах літоўскага міністра ўнутраных спраў Агне Білатайтэ, практычнай рэалізацыі пагаднення не было з часу "несправядлівых прэзідэнцкіх выбараў" у Беларусі ў 2020 годзе.
"Літва не бачыць магчымасцяў для супрацоўніцтва з варожымі рэжымамі, — кажа Білатайтэ. — Беларусь, будучы найбліжэйшым саюзнікам крамлёўскага рэжыму, працягваючы гібрыдную атаку супраць Літвы і рукамі сваіх чыноўнікаў выцясняючы нелегальных мігрантаў у нашу краіну, не можа і не будзе партнёрам Літвы ні ва ўнутраных справах, ні ў іншых сферах".
Яшчэ шэраг пагадненняў МУС Літвы з беларускім міністэрствам могуць быць скасаваны толькі рашэннем ураду.
