"Мы зрабілі сістэме даволі балюча" — Апейкін пра завочны прысуд

Дырэктар Беларускага фонду спартыўнай салідарнасці Аляксандр Апейкін пракаментаваў Радыё Свабода завочны прысуд, агучаны 26 снежня ў Мінску — 12 гадоў калоніі ўзмоцненага рэжыму (Аляксандра Герасіменя атрымала 12 гадоў калоніі агульнага рэжыму). Ён кажа, што для яго ён быў цалкам чаканы.

"Было зразумела і відавочна, што мы зрабілі сістэме даволі балюча, — гаворыць Апейкін. — Сістэма цяпер нервуецца, сістэма перажывае... Сістэма, якая генеруе такія прысуды, адчувае поўную няўпэўненасць у сабе. Насамрэч ва ўлады ўсё вельмі дрэнна. Трымацца ўлада можа толькі на рэпрэсіях, больш у яе няма ніякіх падмуркаў". 

Што тычыцца маёмасці, канфіскаванай на карысць дзяржавы, Аляксандр Апейкін кажа, што ў яго забралі нейкія дробязі кшталту тэлефонаў — буйной нерухомасці ў яго не было.

Апейкін і Герасіменя былі завочна асуджаны ў Беларусі за дзейнасць у Беларускім фондзе спартыўнай салідарнасці, заклікі да санкцый.