На мінскім канцэрце Стынга не будзе танцпола

Канцэрт мяркуецца цалкам партэрным, то бок сядзячым. На канцэрце Стынга з брытанскім Каралеўскім філарманічным аркестрам, які пройдзе ў "Мінск-Арэне" 18 верасня, не будзе танцпола. Па словах арганізатара імпрэзы, кіраўніка праекта Allstars.by Андрэя Шпіта, наяўнасць сімфанічнага аркестра цалкам выключае магчымасць таго, што нехта з гледачоў будзе стаяць ці танчыць падчас выканання музыкі.

Андрэй Шпіт: "Канцэрт адбудзецца з вялікім аркестрам. У Мінск прыедуць 50 музыкаў, а з імі больш за 40 мэнэджэраў і тэхнікаў. Гэта сімфанічная музыка, няхай сабе і Стынг. Таму мы ад пачатку вырашылі, што канцэрт будзе партэрным. Танцпола не будзе".

Стынг вязе ў Мінск праграму "Simphonicity". Працягласць першых канцэртаў гэтага сусветнага тура, якія адбыліся днямі ў Ванкуверы, склала каля 3 гадзінаў.

Па словах арганізатараў, падчас перамоваў, на якія прадстаўнікі Allstars.by адмыслова лёталі ў Канаду, была знойдзеная магчымасць зрабіць квіткі для беларусаў таннейшымі, чым звычайна. Іх кошт будзе пачынацца ад 120 тысяч рублёў.


Фота: alicepush.ucoz.ru