Аляксандр Барсукоў — фанатам: Трэба прымаць меры, каб зняць напружанне

Фанаты футбольнага“Дынама-Мінск” працягваюць байкатаваць матчы свайго клуба. Сітуацыя распалілася праз тое, што правілы праходу на стадыён сталі, на іх думку, беспрэцэдэнтна жорсткімі. З тым, што перад уваходам на стадыён міліцыя здзяйсняе пільны дагляд і здымае на відэа, фанаты нібыта звыкліся. Але перапісванне дадзеных пашпартоў у выніку прывяло да байкатавання матчаў. 

“Калі праходзяць матчы, мы абавязаны праводзіць мерапрыемствы па даглядзе. Каб потым гледачы спакойна адчувалі сябе на стадыёне. Такіх мерапрыемстваў павінен быць комплекс ― у тым ліку і здымкі на відэа, ― тлумачыць падчас прамой лініі начальнік мінскай міліцыі Аляксандр Барсукоў. ― Тое самае робяць у Расіі. Калі дзелімся досведам з замежнымі калегамі, то аказваецца, што і яны праводзяць аналагічныя мерапрыемствы. Вам баяцца няма чаго. Няхай нават вам у ветлівай форме прапануюць даць рэчы для дагляду. Ці прыніжае гэта неяк вашу чалавечую годнасць?”

Яўген Валошын: Наконт дагляду, каб ніхто не пранёс, скажам, нож, я згодны, не спрачаюся. Дыскамфорт выклікае іншае. Калі даходзіць да таго, што ў фанатаў перапісваюць пашпартныя дадзеныя, то мне здаецца ― гэта перагіб. Не падабаецца і тое, што ў лоб здымаюць на партатыўную відэакамеру, як злодзеяў у крымінальнай хроніцы. Можа, канешне, і на “Камп Ноў” на ўваходах усталяваны камеры, але іх не відаць. Магчыма, стаяць незаўважныя відэарэгістратары.

Аляксандр Барсукоў: Можа быць, вы і правільна падказваеце нам. У будучыні мы гэта, магчыма, улічым. Але мерапрыемствы па даглядзе мы праводзіць у любым разе абавязаны. Самае галоўнае ― бяспека. У той жа час супрацоўнікі міліцыі павінны паводзіць сябе карэктна ў адносінах да грамадзян. Не абражаць, не прыніжаць чалавечую годнасць, прадстаўляцца. Жанчын павінны даглядаць жанчыны, мужчын ― мужчыны. Дагляд павінен праводзіцца ў пальчатках, каб прытрымлівацца гігіены. Наконт відэарэгістратараў ― паглядзім. Што тычыцца перапісвання пашпартных дадзеных… Нам патрэбна ведаць фанацкія рухі, хто туды ўваходзіць. А якім чынам атрымліваць інфармацыю ― мы прадумаем. Бліжэйшым часам мы сустрэнемся з кіраўнікамі гэтых рухаў, старшынямі футбольных клубаў. Паспрабуем гэта пытанне адрэгуляваць. Калі ёсць незадавальненне ― трэба прымаць меры, каб зняць напружанне. Галоўнае ― не ісці на павадку ў меншасці. Таму што ёсць дамоўныя сустрэчы паміж фанатамі, дзе яны высвятляюць адносіны пры дапамозе фізічнай сілы. Гэта можа адбывацца ў грамадскіх месцах, дзе адпачываюць людзі. Такія выпадкі былі ў мінулым годзе. Фанаты хочуць выпрасіць дазвол карыстацца дымавымі шашкамі, нейкімі выбуховымі пакетамі. Гэта недапушчальна ― побач людзі знаходзяцца. Што тычыцца пашпартных дадзеных, то гэту тэму мы з падначаленымі абмяркоўвалі, працуем у гэтым кірунку. Гэта пытанне адрэгулюем.

Аляксандр Барсукоў

Яўген Валошын: Калі ў еўракубках гуляла мінскае СКА, то ахова грамадскага парадку ў Палацы спорту была адладжана вельмі добра. Арганізавалі нават дадатковыя парковачныя месцы каля арэны. Калі быў чэмпіянат Еўропы па боксе, таксама да гледачоў ставіліся нармальна. А футбольныя заўзятары ў той жа час скардзяцца. Так, сярод іх могуць быць і маргіналы, але сустракаюцца і банкіры, і бізнесоўцы, і навукоўцы. Фанаты выглядаюць ярка, і да іх можа быць  прадузятае стаўленне. Адсюль і праблемы.

Аляксандр Барсукоў: Дзякуй за падказку. Калі здараюцца выпадкі хамства, высакамернасці, знявагі, мы маланкава рэагуем на гэта. На кожным кантрольна-прапускным пункце заўжды ёсць старэйшы па званні. Калі такія выпадкі здараюцца, трэба падысці да старэйшага афіцэра і паскардзіцца. І будзе хуткая рэакцыя. У кожным разе мы на гэты бок медаля звернем увагу. Калі ў некага адпаведная сімволіка, незвычайныя галаўныя ўборы ― я толькі гэта вітаю. Але самі разумееце, ёсць і нядобрыя заўзятары. Нехта прыходзіць у стане алкагольнага ап’янення. Мы абавязаны рэагаваць. Я сам прысутнічаю на ўсіх мерапрыемствах. У душы таксама перажываю за той ці іншы клуб, канешне, не выстаўляючы свае эмоцыі. Калі нехта з падначаленых некарэктна сябе паводзіць, тут жа прымаем рашэнні. Але ўсё ж прапускны рэжым павінен быць прапускным рэжымам. А калі ў вас будуць іншыя прапановы ― тэлефануйце.

ФК “Дынама-Мінск”: “Круглыя сталы з міліцыяй праводзяцца ўвесь час ― выніку няма”

“Усё пачалося пасля перапісу пашпартоў. Гэта быў матч з БАТЭ, які гулялі на стадыёне “Трактар”, ― апісвае сутнасць канфлікту Андрэй Чашэйка, спецыяліст па працы з заўзятарамі “Дынама-Мінск”. ― На ўваходзе пасля працэдуры дагляду, за рамкамі, былі супрацоўнікі міліцыі, якія ўсіх спынялі і перапісвалі дадзеныя пашпартоў. Хто звесткі не падаваў, далей не прапускалі”.

Еўрарадыё: Пашпарты прасілі ва ўсіх, хто прыходзіў на стадыён?

Андрэй Чашэйка: Не, толькі ў тых, хто ішоў на фанацкі сектар. З боку клуба з’явілася цікавасць, чым выкліканы такія меры. Дакладнага адказу не было. Міліцыя аргументавала гэта бойкамі ў горадзе, нейкімі нераскрытымі злачынствамі, нейкай аператыўнай інфармацыяй. Дакладна ніхто нічога не казаў. Гэта сітуацыя стала апошняй кропляй. Зразумела, што дагляд неабходны. І нават відэаздымкі ― гэта патрабаванне УЕФА. Але байкот звязаны з тым, што на хатніх матчах на фансектары ты на дзве гадзіны аказваешся ў жорсткім ачапленні і не можаш па сваёй волі выйсці нават са стадыёна. Нават у туалет ты можаш трапіць толькі пад суправаджэннем і толькі тады, калі дазволіць міліцыя. На стадыёнах няма нармальных пунктаў харчавання, не створаны цывілізаваныя ўмовы для адпачынку. 

Еўрарадыё: Пасля таго, як фанацкі сектар апусцеў і інфармацыя разышлася па СМІ, ці выходзіла на вас міліцыя з прапановамі вырашыць праблему?

Андрэй Чашэйка: Цяпер вядуцца перамовы, і павінен адбыцца чарговы круглы стол. Заўзятары ўжо не жадаюць камунікаваць з супрацоўнікамі міліцыі, бо круглыя сталы праводзяцца ўвесь час ― і ніякіх зменаў. А ў гэтым годзе сітуацыя стала яшчэ больш напружанай. Інцыдэнты здараюцца, відаць, таму што футбольныя фанаты асацыююцца выключна з непажаданымі элементамі грамадства, якія паўсюль парушаюць грамадскі парадак. Але важна зразумець, што фанаты ― гэта звычайныя людзі. Ходзяць на футбол і іх дзеці, і жонкі. Людзі проста бываюць на стадыёне, каб адпачыць, выплеснуць эмоцыі. А стаўленне такое, нібы яны прыйшлі парушаць парадак.

Еўрарадыё: Ёсць выпадкі, калі фанаты б’юцца… Гэта, відаць, галоўная падстава для такога стаўлення з боку міліцыі.

Андрэй Чашэйка: Людзі, якія б’юцца, звычайна на стадыён не ходзяць. Не ўзгадаю выпадкаў боек на тэрыторыі спартыўных арэн. Б’юцца і звычайныя людзі ў горадзе. А праблему зацыклілі на ўсіх фанатах, вядуць з імі бясконцую барацьбу, хоць у пераважнай большасці людзі прыйшлі адпачыць, падтрымаць каманду.

P.S. Праблема футбольных фанатаў з міліцыяй нагнала аскому. Скандалы ўспыхваюць штомесяц, а воз стаіць на месцы.

Калі глядзець на справу глабальна, праблема ― у абыякавасці да асобы,  непавазе ў грамадстве. Міліцыя, з аднаго боку,  не дапускае інцыдэнтаў і боек ― гэта добра. Але бяспека даецца такой цаной, што апрыёры да людзей, якія выклікаюць падазрэнне з-за стракатай амуніцыі, ставяцца як да “няверных”. І гэта замкнёнае кола, якое спыняе ў развіцці футбольную галіну  і спартовы рынак у цэлым. Бо навошта патрэбны футбол без актыўных гледачоў?