Наколькі вырастуць цэны, калі ўлады Беларусі адмовяцца ад іх стрымлівання?

— Вытворцы сельскагаспадарчай прадукцыі і аптовыя прадаўцы бачаць, што на замежным рынку, у той жа Расіі, можна прадаць кілаграм бульбы не за тры беларускія рублі, напрыклад, а за восем. І, вядома, яны будуць імкнуцца вывозіць на экспарт увесь тавар, які расце ўнутры краіны і быў прызначаны для ўнутранага спажывання, — расказала Аліса Рыжычэнка.

Калі вытворца вывозіць прадукцыю на экспарт, унутры краіны расце спажывецкі попыт праз павелічэнне заробкаў. Гэта прыводзіць да дэфіцыту, які кампенсуюць дарагім імпартам. У выніку Беларусь вымушаная закупляць бульбу па цане, у два-тры разы вышэйшай за ўласную.  

— У выніку мы ўбачылі забарону з боку чыноўнікаў на вываз, як у 90-я гады. І гэта не ўпершыню. Мы ўжо бачылі такую сітуацыю і з яблыкамі, і з цыбуляй. То бок гэта абсалютна заканамерныя наступствы рэгулявання цэн. Гэта вынік тых захадаў, якія ў моманце дазволілі захаваць рост рэальных даходаў беларусаў, захаваць на ўмоўна нізкім узроўні інфляцыю, але пры гэтым атрымаць у выніку велізарную колькасць імпартнай бульбы, — сказала Аліса Рыжычэнка.

Экспертка прыходзіць да высновы, што пасля адмены пастановы многія тавары будуць значна расці ў цане.