Нават Байдэн больш не можа глядзець на тое, што адбываецца ў Газе — #ІхНоравы

26/03/2024 - 16:23

#ІхНоравы / @rubanau_collage

Хто ўважліва сочыць за сусветнай павесткай праз нашыя агляды — той бачыць святло ў канцы тунэлю. Сёння святлом у канцы тунэлю мы называем відэа з уцёкамі страўса, так што дачытвайце да канца!

ААН прыняла рэзалюцыю, якая ні на што не паўплывала

ААН усё ж удалося прыняць рэзалюцыю, у якой краіны заклікалі да спынення агню ў Газе і вызвалення ўсіх захопленых тэрарыстамі ХАМАСа ізраільскіх закладнікаў.

Рэзалюцыю прымалі доўга, складана, і ўсё атрымалася не з першага разу — складаней, чым беларускую касманаўтку на МКС адправіць. А калі рэзалюцыю ўсё ж прынялі, аказалася, што яна ні на што не паўплывала. Бо Ізраіль не спыніў баі ў сектары Газа.

Сведкі ў Газе кажуць, што ізраільскія ваенныя самалёты ўжо бамбілі паўднёвы горад Рафах, які знаходзіцца на мяжы з Егіптам.

Але што сапраўды важна ў гэтай рэзалюцыі — ЗША, саюзнік Ізраіля, дазволілі яе прыняць, хоць маглі накласці вета. Джо Байдэн — вялікі прыхільнік Ізраіля, ён называе сябе сіяністам, суперажывае ізраільскай трагедыі, якая здарылася ў кастрычніку, і хоча, каб ХАМАС пацярпеў паразу. Але хоча гэтаксама, каб Ізраіль зрабіў гэта правільным спосабам.

Чаму наяўны спосаб здаецца няправільным нават ізраільскім саюзнікам? Пра гэта ў Савеце ААН па правах чалавека сёння раскажа спецыяльная экспертка па акупаваных тэрыторыях Франчэска Альбанезэ. Яна лічыць, што ёсць падставы меркаваць: Ізраіль здзейсніў акты генацыду ў сектары Газа. Ізраіль называе гэты даклад Альбанезэ "абуральным скажэннем" Канвенцыі аб генацыдзе.

Пакуты Асанжа працягваюцца, але не ў ЗША

Хутчэй за ўсё, заснавальнік WikiLeaks Джуліян Асанж зможа судзіцца далей супраць сваёй экстрадыцыі ў ЗША.

Амерыканскія пракуроры дамагаюцца прыцягненьня 52-гадовага Асанжа да суда, спасылаючыся на амерыканскі Закон аб шпіянажы. Нагадваем прычыну: WikiLeaks публікаваў канфідэнцыйныя ваенныя справаздачы ЗША і дыпламатычныя тэлеграмы.

Асанж хоча падаць апеляцыю на папярэдняе рашэнне суда, і сённяшні суд меў вырашаць, ці можа ён гэта зрабіць. У выніку пастанавілі, што амерыканцы павінны даць гарантыі таго, што ў Штатах Асанж не падпадзе пад смяротнае пакаранне. А яшчэ — што, абараняючы сябе, ён зможа спасылацца на першы артыкул амерыканскай Канстытуцыі, якая гарантуе ўсім магчымасць свабоды выказвання. Калі гэтыя гарантыі не будуць прадастаўленыя, Асанж зможа падаць апеляцыю.

Адвакаты Асанжа сцвярджаюць, што яго судовы пераслед быў палітычна матываваным. Многія яго прыхільнікі лічаць Асанжа героем, які выступае супраць істэблішмента, а пераследуюць яго за выкрыццё правапарушэнняў ЗША і магчымых ваенных злачынстваў.

Але ЗША запэўніваюць, што публікацыя зліваў паставіла пад пагрозу жыцці амерыканскіх агентаў. І што пераследуюць яго за непераборлівую публікацыю імёнаў крыніц, а не за палітычныя погляды.

Вы ўжо і забыліся, колькі гадоў прайшло з таго часу, як Асанж папрасіў прытулку ў пасольстве Эквадора? У траўні стукне дванаццаць. У 2019 годзе міжнародная арганізацыя "Рэпарцёры без межаў" запатрабавала неадкладна выпусціць Асанжа з турмы з гуманітарных меркаванняў.

Яшчэ адзін крок назад ад пацыфізму

Японія гатовая адмовіцца ад ідэй пацыфізму. І змякчае правілы экспарту зброі.

Кабінет міністраў ухваліў экспарт новых знішчальнікаў, якія краіна распрацоўвала разам з Вялікабрытаніяй і Італіяй. Сістэмы знішчальнікаў выкарыстоўваюць тэхналогіі штучнага інтэлекту.

Самалёты можна будзе купіць у краінах, з якімі Японія падпісала абаронныя пакты і дзе няма бягучых канфліктаў. На продаж кожнага самалёта трэба будзе атрымліваць дазвол кабінета міністраў.

А праз пагрозу з боку Кітая і КНДР у краіне да 2027 года плануюць удвая павялічыць вайсковыя выдаткі.

Давайце без палітыкі

Цяпер карыстальнікі Instagram змогуць запатрабаваць не чапляцца да іх з "палітыкай". Дакладней, ім па змоўчанні не будуць паказваць палітычны кантэнт, пакуль яны самі не папросяць яго паказваць.

Гэта значыць, ад карыстальнікаў патрабуецца свядомае стаўленне. Трэба ўважліва даследаваць налады сваёй праграмы і адказна заяўляць: так, я гатовы занырнуць у палітыку.

Не гатовыя? Тады палітычны кантэнт знікне з рэкамендацый, а сярод карыстальнікаў, якіх вам прапануюць зафолавіць, не будзе палітыкаў. Але калі вы ўжо падпісаныя на акаўнты, якія генеруюць звязаны з палітыкай кантэнт, вы будзеце яго бачыць, якую б галачку ні паставілі ў наладах.

Meta будзе адзначаць акаўнты, якія публікуюць палітычны кантэнт, асаблівым чынам. Калі гэта ваш акаўнт і вы атрымалі "метку", тады зможаце абскардзіць рашэнне.

Мы запыталіся ў нашага спецыяліста СММ, ці атрымала Еўрарадыё "чорную метку" ад Instagram. Кажа, пакуль нічога такога няма.

Паглядзіце, ці не ваш?

А ў паўднёвакарэйцаў уцёк страус. Насіўся па вуліцы, некалькі разоў удала выканаў манеўры пасярод затора, але потым усё ж урэзаўся ў невялікі грузавічок. І пабег далей.

Лавілі разам паліцэйскія і ратавальнікі. Зараз страус там, дзе яму і месца — у экапарку. На гэтым усё, далей глядзіце самі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.