Падман, цвіль і фантаны: як "Мінск-Мір" расчароўвае жыхароў

Праз чатыры месяцы пасля падачы дакументаў на рэгістрацыю кватэры (паводле звестак "Онлайнера" на момант публікацыі) пара так і не атрымала ні пасведчання, ні тэхнічнага пашпарта на жыллё.

Хоць яны і цалкам пагасілі доўг за сваю кватэру, яна ўсё яшчэ ім не належыць. 

Доўгае чаканне засялення

"Онлайнер" пісаў, што Анастасія вырашыла купіць кватэру ў "Мінск-Міры" пасля таго, як не знайшла выгадных варыянтаў у Новай Баравой.

Яе выбар спыніўся на доме пад назвай "Сант'яга" — стылёвым шматпавярховіку з прыгожымі трохкутнымі выступамі на фасадах.

У снежні 2022 года мінчанка заключыла дагавор долевага будаўніцтва. Ёй паабяцалі, што дом здадуць да канца 2023 года. 

Спачатку ўсё было выдатна: дом рос як на дражджах. Ледзь не кожны тыдзень на ім дадаваўся новы паверх, але потым нешта пайшло не так. 

Будоўля раптам спынілася.

— Пачалося нешта дзіўнае: быццам і разгар сезону, а на доме будаўнікоў не відаць. Нідзе ні душы. І калі спачатку старалася ўтаймоўваць хваляванне, супакойваючы сябе тым, што, можа, вядуцца работы ўнутры, то к восені стала зразумела, што сітуацыя нездаровая.

Да снежня дом не здалі. Забудоўнік тлумачыў Анастасіі, што цяжкасці паўсталі ў тым ліку са шкленнем: то не было магчымасці закупіць вокны, то яны не падышлі і прыйшлося мяняць падрадчыкаў.

Урэшце, яна захацела прадаць недабудаваную кватэру. Але ёй адмовілі. Узамен прапанавалі замест гэтай кватэры заехаць у іншую, але ўжо гатовую. 

Аднак быў нюанс. Давялося б даплаціць 17 тысяч еўра, якіх у Анастасіі не было.

Фантаны ў пад'ездзе

Як толькі ў Мінск прыходзяць моцныя залевы, у доме "Глазга" на праспекце Міру, 14 пачынаюць адбывацца дзіўныя рэчы.

— Нашаму дому толькі два гады. Аб праблемах, якія ёсць, мы даведаліся не адразу: пакуль рабіліся рамонты, складана было прасачыць, што і дзе адбываецца. Як цяпер стала ясна, першы раз нас заліло больш за год таму — у ліпені 2023-га. Тады суседка з 14 паверха заўважыла, што цячэ труба ліўневай каналізацыі, — расказвае "Онлайнеру" жыхар дома Ілля.

Па яго словах, сёлета сітуацыя пагоршылася: з трубы проста пачалі ліцца фантаны.

— Такое адбываецца не штораз, але ўжо як мінімум чатыры разы пад'езд затаплівала: у траўні, двойчы ў чэрвені і вось учора. Добра, што на першым паверсе яшчэ ніхто не жыве і рамонты-нажыткі не пацярпелі.

Са слоў мужчыны, кампанія, адказная за ліквідацыю наступстваў, заяўляе, што з сістэмай водаадвода ўсё ў парадку. Аднак ён упэўнены, што праблема звязаная з няякасным мантажом, выкарыстаннем непрыдатных матэрыялаў ці няздольнасцю эксплуатацыйнай арганізацыі вырашыць праблему.

Пасля гэтага кампанія пачала вінаваціць у праблеме саміх жыхароў і рамантаванне няспраўнасцяў таксама спрабуюць павесіць менавіта на людзей, якія пражываюць у доме.

— А самае цікавае, што павесіць выпраўленне наступстваў, напрыклад, замену пліткі на столі, спрабуюць на жыхароў, — кажа Ілля. 

Цвіль і вада ў падвале

У жніўні 2023-га ўладальнікі кватэр па вуліцы Брацкай, 17 засяліліся ў свой новы дом — "Гаваі". Хто б ведаў, што назва апынецца гаваркой. Асаблівай якасці ад забудовы жыхары не чакалі, але тое, што яны ўбачылі, аказалася яшчэ горшым, піша Tochka.by.

Многія кватэры ў доме апынуліся проста сырымі — іх падтапіла падчас падачы ацяплення. Радыятары халодныя, сцены не прасыхаюць, і распачаць паўнавартасны рамонт у такіх умовах немагчыма.

Па словах жыхароў, у падвале завялася цвіль, па сцяне пайшла расколіна. Лобі дома перыядычна ператвараецца ў сапраўдны астраўны пейзаж — у духу назвы жылога квартала "Трапічныя выспы", дзе размяшчаецца праблемны дом "Гаваі".

Мінусы ва ўсіх кватэрах аднолькавыя — сляды падтаплення на сценах і падлозе, адсутнасць ацяплення і, як вынік, немагчымасць пачаць рамонт.