Палітолаг: Мартынаў шмат зрабіў, каб размарозіць адносіны з Захадам

Замест яго афіцыйную дэлегацыю ўзначаліць амбасадар Беларусі ў Польшчы Віктар Гайсёнак.

110928 Eurafokus.mp3

Міжтым, палітолаг Андрэй Суздальцаў апісвае Сяргея Мартынава выключна з пазітыўнага боку, што тычыцца дасягненняў палітыка ў адносінах з Еўрасаюзам.

Андрэй Суздальцаў: “Сяргей Мартынаў увогуле займаўся Еўропай. І ён вельмі шмат зрабіў для дыялогу паміж Лукашэнкам і Захадам. І ў пачатку гэтага году прыклаў вялізныя намаганні, каб размарозіць адносіны паміж Лукашэнкам і Захадам. І фактычна прывёў да таго, што Захад прызнаў легітымнасць чацвёртага тэрміну Лукашэнкі. Ён дасягнуў нямала, улічваючы з’яўленне ў Мінску міністра замежных справаў Балгарыі”.

Тым больш дзіўным здаецца прызначэнне да ўдзелу ў саміце "Усходняга партнёрства" не міністра замежных справаў краіны, а амбасадара. Аднак магчыма, што Лукашэнку проста не задаволіў фармат "Усходняга партнёрства".

Андрэй Суздальцаў: “Ён разлічваў, што ўваход Беларусі ва "Усходняе партнёрства" забяспечыць яму пэўную легітымнасць і інвестыцыі з Захаду. Ні таго, ні другога не атрымалася”.

Акрамя таго, на думку спадара Суздальцава, афіцыйны Мінск пакрыўдзіўся на тое, што Беларусь не атрымала спрошчанага візавага рэжыму з Еўрасаюзам, як гэтага ўдалося дасягнуць, да прыкладу, Украіне.

Андрэй  Суздальцаў: “Крыўдаў у Мінска адносна "Усходняга партнёрства" шмат. І ўсе гэтыя дэманстрацыі носяць характар лёгкага шантажа. Вось, вы нашыя надзеі не спраўдзілі, і мы з вамі супрацоўнічаем, калі нам зручна”.

Таксама палітолаг выказаў думку, што адносіны Беларусі з Захадам шмат у чым залежаць ад адносінаў Расіі з Захадам.

Андрэй Суздальцаў: “Беларусь не з’яўляецца суб’ектам палітыкі "Усходняга партнёрства". Гэта аб’ект. Так што Аляксандр Рыгоравіч Лукашэнка — прадукт геапалітыкі”.

Нагадаю, што саміт "Усходняга партнёрства" пачынаецца 29 верасня ў Варшаве і працягнецца два дні.