Палітвязень Андрэй Шарэнда з'ехаў з Беларусі
Андрэй і Паліна Шарэнды з дзецьмі / 3beltv.eu
Брэсцкі актывіст Андрэй Шарэнда, якога абвінавачваюць па двух артыкулах крымінальнага кодэкса, знаходзіцца за мяжой, паведамляюць праваабаронцы.
Працэс па яго справе павінен быў пачацца ў Маскоўскім судзе Брэста 28 чэрвеня, але Шарэнда не прыйшоў у суд. Яго абвясцілі ў вышук. І вось праваабаронцам стала вядома, што ён выехаў з Беларусі.
Шарэнду абвінавачваюць па двух артыкулах КК: "Заклікі да дзеянняў, якія наносяць шкоду нацыянальнай бяспецы" і "Абраза прэзідэнта". З 31 траўня Андрэй знаходзіўся пад хатнім арыштам.
Яго жонку Паліну Шарэнду-Панасюк 9 чэрвеня асудзілі на 2 гады калоніі па трох артыкулах Крымінальнага кодэкса: гвалт або пагроза ўжывання гвалту ў дачыненні да супрацоўніка органаў унутраных спраў, абраза прэзідэнта і абраза прадстаўніка ўлады.
У судзе жанчына заявіла, што не лічыць тое, што адбываецца, судом, таму што "палітычныя рэпрэсіі нічога агульнага з судом не маюць".
Праваабаронцы прызналі і Андрэя, і Паліну Шарэндаў палітвязнямі. У пары двое непаўналетніх дзяцей.
