Памёр беларускі фатограф Уладзімір Парфянок
Уладзімір Парфянок / photoclub.by
У Мінску памёр выдатны беларускі фатограф і дзеяч культуры Уладзімір Парфянок. Пра гэта піша Reform.by са словаў яго сяброў.
Парфянок перастаў выходзіць на сувязь з вечара пятніцы, 12 студзеня. На выходных сябры фатографа спрабавалі звязацца з ім, а ўвечары 14 студзеня прыехалі да яго дадому. Парфянка ў яго кватэры знайшлі ўжо мёртвым.
Час і прычыны смерці творцы высвятляюцца.
Уладзімір Парфянок нарадзіўся ў 1958 годзе. У беларускай фатаграфіі ён стаў адной з самых заўважных асоб. У Творчую фатаграфію Парфянок прыйшоў у 1980-х, ён прадстаўляў "новую хвалю".
Парфянок быў куратарам і адным з заснавальнікаў галерэі візуальных мастацтваў Nova, удзельнічаў у шматлікіх выставачных праектах у Беларусі і за мяжой. Ён быў выкладчыкам Школы фатаграфіі ў Мінску, куратарам Нацыянальнага цэнтра сучасных мастацтваў, майстэрні-музея Заіра Азгура, сябрам Беларускага саюза мастакоў і дарадцам экспертнага савета Беларускага грамадскага аб’яднання фатографаў.
