Памёр слонімскі грамадскі актывіст, доктар Іван Шэга

А 4-й гадзіне раніцы 4 кастрычніка ў Слоніме ва ўзросце 63 гадоў памёр вядомы доктар і грамадскі дзеяч Іван Шэга. Як паведаміў у каментары Радыё "Свабода" яго блізкі сябар Сяргей Чыгрын, у Шэгі было анкалагічнае захворванне.

Шэга нарадзіўся 25 сакавіка 1953 года ў вёсцы Валеўка Навагрудскага раёна, там жа скончыў школу. Потым ён закончыў медыцынскі інстытут у Мінску і з 1980 года працаваў доктарам-траўматолагам у Слоніме.

Шэга актыўна займаўся палітыкай: быў сярод заснавальнікаў слонімскай суполкі БНФ, з'яўляўся сябрам Сойма Партыі БНФ, балатаваўся на парламенцкіх выбарах.
 
У 2013 годзе Шэгу звольнілі — як ён сам лічыў, з палітычных прычынаў. Слонімцы збіралі подпісы за яго вяртанне да лекарскай працы. Пасля выхаду на пенсію доктару не працягнулі працоўны кантракт, тады ён стварыў недзяржаўную ўстанову "Шэгамедконсульт", каб працягваць дапамагаць хворым.