Парламент Арменіі спрабуе не абраць прэм'ера

Дыяна Петрыяшвілі, “Медиасеть”, па матэрыялах JAMnews і "Кавказского узла"

У парламенце Арменіі прайшоў першы тур галасавання за кандыдата на пасаду прэм'ер-міністра. Адзіны кандыдат на гэтую пасаду — Нікол Пашынян, выканаўца абавязкаў прэм'ер-міністра. У выніку за кандыдатуру Пашыняна не прагаласаваў ніхто, 1 дэпутат прагаласаваў супраць, 11 устрымаліся. Але ўсё ідзе па плане.

Галасаванне, аднак, з'яўляецца поўнай фармальнасцю, і калі ўсё пойдзе так, як задумаў армянскі лідар, яго не выберуць прэм'ерам і на наступным тыдні.

Пашынян і яго паплечнікі дамагаюцца правядзення пазачарговых парламенцкіх выбараў, а з гэтай мэтай, па працэдуры, выбары прэм'ер-міністра павінны двойчы праваліцца. Калі дэпутаты не прагаласуюць за кандыдата ў прэм'еры да 31 кастрычніка, парламент будзе распушчаны і ў краіне прызначаць датэрміновыя парламенцкія выбары.

Менавіта гэтага і дамагаецца Нікол Пашынян, выконваючы абавязкі кіраўніка ўрада Арменіі, які падаў у адстаўку 16 кастрычніка.

"Трэба давесці да канца негвалтоўную аксамітную народную рэвалюцыю, якая надарылася ў Арменіі вясной", — сказаў Пашынян 16 кастрычніка, патлумачыўшы сваю адстаўку. Неабходнасць у пераабранні парламента відавочная не толькі Пашыняну і яго паплечнікам, але і яго апанентам, і шматлікім палітычным экспертам у краіне.

Да таго часу як у Арменіі адбылася "аксамітная рэвалюцыя", краіна паспела перайсці да парламенцкай сістэмы кіравання (гэта здарылася на леташніх выбарах у парламент). У выніку "аксамітнай рэвалюцыі" вясной гэтага года да ўлады прыйшла палітычная сіла, у якой няма большасці ў парламенце. Яе лідар Нікол Пашынян узначальвае ўрад, але парламент мае магчымасць блакаваць яго рашэнні.

"Парламент не адлюстроўвае волю народа", — так армянскія эксперты характарызуюць "дарэвалюцыйныя" палітычныя сілы, якія дамінуюць у заканадаўчым органе.

Менавіта з-за гэтага дамінавання ў Арменіі нядаўна зноў адбыўся палітычны крызіс, з-за якога Пашынян сышоў у тэхнічную адстаўку.

У пачатку кастрычніка былая кіруючая Рэспубліканская партыя ініцыявала і правяла ў парламенце законапраект, які фактычна блакаваў роспуск Нацыянальнага сходу. Менавіта гэта справакавала палітычны крызіс у краіне. Тады Пашынян звярнуўся да ўжо выпрабаванага метаду: ён паклікаў людзей выйсці на вуліцы, і неўзабаве натоўп яго прыхільнікаў атачыў будынак парламента.

Пасля гэтага пачаліся перамовы прэм'ер-міністра з парламенцкімі сіламі, якія прывялі да падпісання мемарандума аб правядзенні пазачарговых парламенцкіх выбараў у снежні. Такім чынам, прэм'ер-міністр заручыўся неабходнай колькасцю галасоў і аніякіх перашкодаў для правядзення выбараў у снежні не застаецца.