Паштовая марка за 2 мільёны долараў — чаму не? #ІхНоравы

14/11/2023 - 17:24

Кароткі агляд міжнародных навін / @rubanau_collage

Сёння ў аглядзе міжнародных навін не абыйшлося без палітыкі, але ёсць і пра адзін рэкорд з сусвету філатэлістаў.

Новы Траісты саюз?

Кітай і Расійская Федэрацыя дапамагаюць Паўночнай Карэі нарошчваць ваенны патэнцыял і абыходзіць санкцыі ААН.

"Мы глыбока занепакоеныя тым, што Кітай і Расія дапамагаюць КНДР пашыраць свае магчымасці і дазваляюць ёй ухіляцца ад санкцый Савета Бяспекі ААН", — сказаў міністр абароны ЗША Лойд Осцін, якога цытуе Reuters.

Паводле яго слоў, Штаты і іншыя краіны Арганізацыі Аб'яднаных Нацый занепакоеныя нядаўнім ростам ваеннага супрацоўніцтва паміж Расіяй і КНДР, а таксама перадачай Паўночнай Карэяй узбраення РФ, якое выкарыстоўваецца ў вайне супраць Украіны.

Паўночная Карэя магла паставіць РФ ракеты для вайны супраць Украіны. Гаворка ідзе пра балістычныя ракеты малой далёкасці, супрацьтанкавыя ракеты, пераносныя супрацьпаветраныя ракеты, вінтоўкі, ракетныя ўстаноўкі, мінамёты і снарады. Па словах экспертаў, гэтыя снарады ўжо на фронце ва Украіне.

Саюз Паўночнай Карэі, Расіі і Кітая можа ўзмацніць ядзерны арсенал Пхеньяна, у прыватнасці, за кошт паставак плутонію і высокаўзбагачанага ўрану, неабходных для вытворчасці ядзерных бомб. І гэта выклікае ключавую занепакоенасць на Захадзе, піша Financial Times.

Турцыя разгледзіць заяўку Швецыі на ўступленне ў NATO

16 лістапада камісія турэцкага парламента абмяркуе заяўку Швецыі на ўступленне ў NATO. Яна павінна быць ухваленая да галасавання на Генеральнай асамблеі ў поўным складзе.

Адпаведны крок можа быць важкім у гэтай сітуацыі, пасля таго, як Турцыя выступала супраць ухвалення заяўкі на сяброўства, абвінаваціўшы Швецыю ва ўкрывальніцтве курдскіх баевікоў і іншых груповак, якія Анкара лічыць пагрозай сваёй бяспецы. У прыватнасці, заяўка была адхіленая і Венгрыяй.

Нягледзячы на ўсё, некалькі тыдняў таму прэзідэнт Эрдаган падаў у парламент законапраект аб ратыфікацыі заяўкі Швецыі. Адпаведны крок віталі ў NATO і Стакгольме.
Швецыя падала заяўку на ўступленне ў Паўночнаатлантычны альянс яшчэ ў мінулым годзе. З таго часу яе ратыфікавалі ўсе краіны NATO, акрамя Турцыі і Венгрыі.

Марка за 2 мільёны долараў

На аўкцыёне ў Нью-Ёрку ўстаноўлены новы рэкорд: паштовая марка "Перавернутая Джэні" пайшла за два мільёны долараў.

Тая самая марка / Вікіпедыя

Знакамітую "Перавернутую Джэні" выпусцілі ў 1918 годзе, і намінальны яе кошт складаў 24 цэнты. Унікальнасць гэтай маркі ў тым, што выяўлены на ёй паштовы самалёт Curtiss JN-4, якому далі мянушку Джэні, па памылцы надрукаваны дагары нагамі.

Працаўнікі пошты, натуральна, хутка заўважылі памылку, але ліст памерам у 100 асобнікаў усё ж паспеў выйсці ў абарачэнне — і вось за астатнія з тых ста асобнікаў калекцыянеры-філатэлісты і гатовыя выкласці вялізарныя грошы.

Два мільёны долараў за марку на аўкцыёне Robert A Siegel Auction Galleries заплаціў вядомы калекцыянер, 76-гадовы Чарльз Хэк.