Павышэнне пенсій у Беларусі пад пагрозай
На пенсіі / unsplash.com
Павышэнне пенсій у Беларусі пад пагрозай, бо не хапае працоўнай сілы. Такім меркаваннем у інтэрв’ю “Позірку” падзялілася экспэртка даследчага цэнтру BEROC Анастасія Лузгіна.
Яна адзначыла, што чалавечы рэсурс — неад’емная частка эканамічнага працэсу, а Беларусь губляе працоўную сілу не першы год.
— Калі гэтага рэсурсу становіцца менш, калі ён у дэфіцыце, як у Беларусі, то ўзнікаюць праблемы і ў сферы вытворчасці, і ў сферы паслуг. У выніку гэта абмяжоўвае магчымасці росту таго ж ВУП, — гаворыць экспертка.
Згодна з афіцыйнай статыстыкай, на канец 2021 года на рынку працы было 92 тысячы вакансій, 2022-га — 95 тысяч, 2023-га — амаль 135 тысяч.
Анастасія Лузгіна нагадвае, што сённяшнія работнікі забяспечваюць пенсіянераў.
— Калі работнікаў становіцца менш, зніжаецца аб’ём адлічэнняў у ФСАН, які і так дэфіцытны. Цяпер дзяржава пераразмяркоўвае рэсурсы і закрывае гэты мінус. Калі праблема захаваецца, гэта значна паменшыць магчымасці павышэння пенсій у намінальным выражэнні і захавання іх суадносін да сярэдняй заработнай платы на ўзроўні 40%.
