Перадыхнуць і не толькі: серыялы, якія не варта прапускаць гэтай зімой

Заходнія студыі і тэлеканалы акрыялі ад шоку, якім стаў пандэмійны лакдаўн, з усімі пераносамі здымак і затрымкамі праектаў, і зноў радуюць колькасцю новых серыялаў. Як не заблытацца ў такой колькасці назваў? Еўрарадыё сабрала топ серыялаў гэтай зімы, якія атрымалі выдатныя водгукі і крытыкаў, і гледачоў.
 

"Апошнія з нас"

Адаптацыі гульняў у фільмы і серыялы рэдка заканчваюцца поспехам: праваліўся ў свой час "Прынц Персіі", няўдалымі былі фільмы пра Лару Крофт, крытыку зазнаў і "Анчартэд". Але "The Last of Us" ("Апошнія з нас"), здаецца, змаглі перамагчы гэты стэрэатып: пасля прэм'ернага паказу на HBO і крытыкі, і гледачы засталіся ў захапленні. Яшчэ б: адзін са стваральнікаў серыяла — аўтар таго самага "Чарнобыля", а ў галоўных ролях — знаёмыя па "Гульні тронаў" акцёры.

"Апошнія з нас" — постапакаліпсіс: у свеце бушуе страшны грыбок, які ператварае людзей у пагрозлівае нешта, якое нападае на іншых. Галоўныя героі — мужчына і яго дачка-падлетак, якія спрабуюць выжыць.

"Каўбой з Капенгагена"

Зняты аўтарам фільмаў "Драйв" і "Неонавы дэман" Нікаласам Віндынгам Рэфнам, "Каўбой з Капенгагена" — мудрагелісты шасцігадзінны неануар, які можна цалкам паглядзець за адзін выходны. Расказваць пра сюжэт серыяла складана: тут і паранармальныя здольнасці, і адваротны бок крымінальнага свету Даніі. І ўсё гэта — з арыгінальным (і часам вельмі дзіўным) візуалам.

Так, "Каўбой з Капенгагена" ад Netflix нельга назваць серыялам для таго, каб адпачыць, але атрымаць ад яго задавальненне, асабліва калі вы стаміліся ад класічных дэтэктываў, дакладна ўдасца.

"Белы лотас"

Гэты серыял пачаў выходзіць яшчэ летам 2021-га, але ўсе загаварылі пра "Белы лотас" толькі пасля таго, як некалькі фраз адтуль завірусіліся ў Ціктоку. Хоць гэта не адзіны моцны бок серыяла ад HBO: за два сезоны, якія ўжо выйшлі (апошні — у канцы восені 2022-га), стваральнікі атрымалі нямала прыстойных узнагарод і намінацый, у тым ліку "Залаты глобус".

Камедыйна-драматычны (во спалучэнне, праўда?) "Белы лотас" расказвае пра групу адпачывальнікаў у аднайменным гатэлі. Ну а што яны там перажываюць — варта ўбачыць самім.

"1899"

Яшчэ адзін заблытаны серыял ад Netflix, які выйшаў у канцы мінулага года. "1899" знялі стваральнікі ўжо культавай "Цемры" — але стрымінг вырашыў не працягваць шоу на другі сезон. Але гэта не азначае, што глядзець яго не варта.

У цэнтры сюжэту — група людзей на параходзе з Лондана ў Нью-Ёрк, якая спрабуе разгадаць заблытаную і страшную таямніцу. Самае тое, каб захапіцца на некалькі гадзін.

"Sexify"

Яшчэ адзін еўрапейскі прадукт, "Sexify", зняты польскімі партнёрамі Netflix. Самы лёгкі серыял з нашай падборкі: простая камедыя пра дзяўчыну-праграмістку, якая рашыла зрабіць мабільную праграму для сексу. У пачатку студзеня выйшаў другі сезон — і там прыгоды ў гераіні і яе сябровак сталі яшчэ больш пацешнымі (і больш жыццёвымі).

Вядома, гэта не "Палавое выхаванне", але і польскі серыял можа быць простым, лёгкім і пацешным. Прабавіць час, пакуль за акном дрэннае надвор'е, ён дапаможа дакладна.