Польшча патрабуе, каб вагнераўцы пакінулі Беларусь
Вагнераўцы ў Беларусі / прэс-служба Мінабароны Беларусі
Афіцыйная Варшава патрабуе, каб з Беларусі былі выведзеныя вагнераўцы. Пра гэта заявіў міністр унутраных спраў Польшчы Марыюш Камінскі.
"Мы патрабуем ад рэжыму Лукашэнкі, каб ПВК "Вагнер" неадкладна пакінула тэрыторыю Беларусі і каб неадкладна пакінулі памежную зону мігранты, сабраныя там беларускімі службамі", — прыводзіць інфармагенцтва PAP словы міністра.
Як распавядала Еўрарадыё, 28 жніўня адбылася сумесная нарада міністраў унутраных спраў Польшчы, Літвы, Латвіі, Эстоніі. Яны абмяркоўвалі сітуацыю на мяжы з Беларуссю і прынялі рашэнне, пры якіх умовах гэтыя межы будуць цалкам перакрытыя.
Аднак Камінскі дадаў, што будуць распрацоўвацца "такія механізмы, такія каналы, каб кожны, каму пагражаюць рэпрэсіі ў Беларусі ў сітуацыі, калі ўсе памежныя пераходы зачыненыя, мог бяспечна дабрацца да нашых краін".
