Прадзюсарскі цэнтр нявесткі Лукашэнкі запусціў свой відэапрадакшн

“Музычная медыякампанія”, намесніцай дырэктара якога з’яўляецца Таццяна Кулакова (родная сястра Ганны Лукашэнка, жонкі Дзмітрыя Лукашэнкі), запусціла ўласны відэапрадакшн. Як высветліла “Бюро”, прадзюсарскі цэнтр ужо адпрацаваў некалькі дзяржзамоваў.

Да прыкладу, у кастрычніку яны прэзентавалі іміджавы кліп Беларускага металургічнага завода на песню “Мацнейшыя за сталь”. Ролік быў прысвечаны саракагоддзю прадпрыемства, аўтаркай песні стала сама Ганна Сялук (псеўданім Ганны Лукашэнка).

Здымкі роліка праходзілі ў гарачых цэхах жлобінскага гіганта машынабудаўніцтва з удзелам супрацоўнікаў прадпрыемства, а новы “гімн БМЗ” выканалі артысты, якія супрацоўнічаюць з “Музычнай медыякампаніяй”: гурт Cosa Nostra, Вікторыя Алешка, Ганна Благава, Андрэй Цямчык і саліст арт-гурта “Беларусы” Валер Шмат.

Акрамя таго, у гонар юбілею БМЗ запрашаў беларусаў на святочны канцэрт у Жлобіне, дзе былі анансаваныя “зоркі” ўсё той жа “Музычнай медыякампаніі”, а хэдлайнерам гарадской вечарынкі стаў расійскі спявак Niletto.

“Бюро” таксама знайшло камерцыйныя ролікі вытворчасці “Музмедыя прадакшну” для іншых буйных беларускіх машынабудаўнічых холдынгаў: “Белшыны”, Магілёўскага аўтамабільнага завода (МААЗ) і БелАЗа.

Акрамя дзяржпрадпрыемстваў відэапрадакшн “Музычнай медыякампаніі” ўжо зрабіў кліпы і сваім выканаўцам: Аляксандры Мелех, трыа “Ружовыя ружы”, Леры Бернатовіч & Арцёму Скаролю і Вользе Козыр.

Як высветліла “Бюро”, “Музычная медыякампанія” належыць Палацу рэспублікі Кіраўніцтва справамі Лукашэнкі (30%) і прыватнай кампаніі “АНСЛ прадакшн” (70%).

Апошняя запісаная на Андрэя Урублеўскага (95%) — аднаго з падначаленых Дзмітрыя Лукашэнкі. Урублеўскі быў дырэктарам Клуба тэніса, якім валодае Прэзідэнцкі спартовы клуб пад кіраўніцтвам Дзмітрыя Лукашэнкі, і не раз лётаў з сям’ёй свайго начальніка на бізнес-джэтах.

Імаверна, Урублеўскі выконвае ў “АНСЛ прадакшн” функцыю намінальнага ўладальніка, каб схаваць удзел у кампаніі жонкі свайго патрона.

Абрэвіятура АНСЛ вельмі нагадвае ініцыялы жонкі сярэдняга сына Лукашэнкі — АНна (па-руску) Сяргееўна Лукашэнка.