Прэзідэнт Румыніі з братам апынуліся ў цэнтры палітычнага скандалу

Як паведамляе РБК, Мірча Бэсеску арыштаваны ў межах крымінальнай справы пра подкуп суддзяў і пракурораў з мэтай вынясення спрыяльнага судовага прысуду крымінальнаму аўтарытэту Санду Ангела.

На пачатку гэтага тыдня мясцовыя СМІ апублікавалі відэазапіс, зроблены схаванай камерай. На запісе Мірча Бэсеску абяцае за плату дапамагчы вызваленню з турмы асуджанага за забойства Ангела. Брат прэзідэнта планаваў выкарыстаць уплыў кіраўніка дзяржавы на старшыню Вышэйшай судовай касацыйнай палаты Румыніі.

Неўзабаве пасля апублікавання відэа прэм'ер-міністр Румыніі Віктар Понта заявіў, што "натуральным крокам" для Траяна Бэсеску стане сыход у адстаўку. Сам прэзідэнт Бэсеску сыходзіць у адстаўку адмовіўся і заявіў, што не мае да справы дачынення.

Румынія займае трэцяе месца па ўзроўні карупцыі сярод краін ЕС. Перад ёй ідуць толькі Балгарыя і Грэцыя.

Фота Траяна Бэсеску — kommersant.md