Рассельгаснагляд паставіў 11 беларускіх прадпрыемстваў на ўзмоцнены кантроль

Федэральная служба па ветэрынарным і фітасанітарным наглядзе РФ паведамляе, што чарговы раз знайшла антыбіётыкі і патэнцыйна небяспечныя для здароўя чалавека мікраарганізмы ў сельскагаспадарчай прадукцыі з Беларусі. З 11 ліпеня Рассельгаснагляд часова абмяжоўвае пастаўкі са Скідзельскай птушкафабрыкі, ААТ "Александрыйскае" і ААТ "Малочны свет".

Таксама фітасанітарнае ведамства ўводзіць рэжым ўзмоцненага лабараторнага кантролю ў адносiнах да 11 беларускіх прадпрыемстваў. У прадукцыі агракамбіната "Зара" і РУП "Беларуснафта-Асобіна" знойдзеныя рэшткі антыбіётыка энрафлаксацына. У таварах з ААТ "Верхнядзвінскі масласырзавод", ААТ "Маладзечанскі малочны камбінат" (Вілейскі філіял), ААТ "Малочныя горкі" і ААТ "Рагачоўскі МКК" выяўленыя сляды яшчэ аднаго антыбіётыка — лінкаміцына. 

Рэшткі іншых прэпаратаў знойдзеныя ў прадукцыі ААТ "Бабулін гарлач", ААТ "Савушкін прадукт", ААТ "Салігорская птушкафабрыка", ААТ "Смалявічы бройлер". А ў ялавічыне з Баранавіцкага РАЙПО Рассельгаснагляд разгледзеў бактэрыі роду Listeria monocytogenes.

Расійскае ведамства папярэджвае, што ў выпадку паўторных парушэнняў будзе вымушанае ўвесці абмежаванні на пастаўкі прадукцыі з гэтых прадпрыемстваў.