Следчыя затрымалі супрацоўніка прадпрыемства, прадукцыяй якога масава атруціліся дзеці

Масавае атручэнне дзяцей у Мінскай вобласці было выкліканае парушэннем санітарна-эпідэміялагічных нормаў на прадпрыемстве, якое займаецца вырабам малочнай прадукцыі.

Падазраванага работніка затрымалі ў рамках крымінальнай справы, паведамляе прэс-служба Следчага камітэта. З ім праводзяцца следчыя дзеянні. Таксама следчыя высвятляюць іншых пацярпелых. Прадукцыя знятая з продажу.

На мінулым тыдні каля 30 дзяцей у Барысаве трапілі ў лякарню з млоснасцю і ванітамі. Пазней яшчэ паўтара дзясятка дзяцей у розных населеных пунктах Міншчыны звярнуліся да медыкаў з аналагічнымі сімптомамі.

У Мінздароўя паведамілі, што прычынай масавага атручэння дзяцей стаў малочны напой "Біфідзін", выраблены прадпрыемствам "Біямалпрам".

У Следчым камітэце заявілі, што праводзяць маштабную прафілактычную працу з прадпрыемствамі малочнай галіны па ўсёй краіне. Праверка выявіла, "што падобныя парушэнні не з'яўляюцца сістэмнымі і не носяць масавы характар".