Ускладненні аж да смерці: як перажыць спёку

Гэтым летам у некаторых рэгіёнах Беларусі тэмпература паветра ўжо перавышала 30°С. Мяркуючы з чаканняў сіноптыкаў, гарачых дзён будзе яшчэ шмат.

Гэта значыць, што беларусам пагражаюць цеплавыя і сонечныя ўдары і проста дыскамфорт ад занадта высокай тэмпературы. Еўрарадыё даведалася, што рэкамендуюць беларускія медустановы, каб лягчэй перанесці спёку. А таксама як дапамагчы сабе і іншым у выпадку неабходнасці.

Што адбываецца з чалавекам у спёку?

Пры высокай тэмпературы паветра ў чалавека павышаецца потавыдзяленне. Праз гэта парушаецца водны і солевы баланс, жыўленне цягліцавых клетак пагаршаецца, падае працаздольнасць арганізма, могуць часцей адбывацца сардэчна-сасудзістыя прыступы.

З'яўляецца рызыка атрымаць цеплавы або сонечны ўдар. У выпадку з другім неабавязкова быць на адкрытым сонцы. Гэтыя праявы можна пазнаць па падвышанай тэмпературы цела, пачашчаным пульсе, галавакружэнні, ванітах. Часта чырванее скура. У цяжкіх выпадках чалавек губляе прытомнасць, з'яўляюцца курчы.

Як пазбегнуць удараў і перанесці высокую тэмпературу лягчэй?

Базавая рэкамендацыя — як мага менш быць на адкрытым сонцы, асабліва калі яно найбольш актыўнае, гэта значыць, з 12:00 да 16:00. Калі выйсці на вуліцу ў гэты час трэба, абараняйцеся ад сонечных прамянёў лёгкім светлым адзеннем, капелюшамі і парасонамі.

Каб кампенсаваць страту вадкасці праз потавыдзяленне, варта больш піць. Ідэальна — астуджаную ваду без газу. Ад алкаголю, кавы і салодкіх газаваных напояў лепш адмовіцца. Праз іх арганізму будзе цяжэй спраўляцца са спякотай. Калі доктар рэкамендаваў абмежаваць спажыванне вады праз праблемы з ныркамі, то трэба пракансультавацца з ім, як быць.

Асцярожней трэба быць з ежай — абмежаваць пакупкі з рук, бо ў спякоту бактэрыі размнажаюцца вельмі хутка. Таксама аддайце перавагу лёгкай ежы, напрыклад, халадніку і агароднінным салатам. Лепш пазбягаць смажанага і салодкага.

Што рабіць, калі ўсё ж зрабілася дрэнна?

Калі вы выявілі прыкметы цеплавога або сонечнага ўдару (разнавіднасць цеплавога), трэба адразу звярнуцца па дапамогу да медыкаў. Ускладненнямі пры цеплавым удары могуць быць шок, пашкоджанне мозгу і ўнутраных органаў і смерць.

У якасці першай дапамогі Міністэрства аховы здароўя рэкамендуе зайсці ў прахалоднае кандыцыянаванае памяшканне, напрыклад, гандлёвы цэнтр або кінатэатр. Таксама здыміце цеснае адзенне і абутак.

Дапаможа вада: прахалодны душ або абкручванне вільготнай прасцінай пад вентылятарам.

Цеплавы ўдар адбываецца не толькі праз абязводжванне, але і праз страту соляў, якія выходзяць з потам. Таму рэкамендуецца разбавіць у літры вады дзве чайныя лыжкі солі і выпіць.

Каб знізіць тэмпературу цела, да шыі, спіны, вобласці падпах і пахвіны можна прыкласці мяшэчкі з лёдам.