Гучныя адкрыцці года ў навуцы

29/12/2012 - 20:11

Часопіс The Scientist Magazine зрабіў рэйтынг з дзесяці інавацый, якія паскорылі развіццё сусветнай навукі.

Сярод значных адкрыццяў, напрыклад, сістэма BioFab, якая вырабляе сінтэтычныя ДНК: хуткасць працэсу паскорылася, а колькасць прадукту стала большай.

Яшчэ адна прылада, Ion Proton System, пераўтварае хімічную інфармацыю ў лічбу і дазваляе больш хутка і эфектыўна праводзіць даследаванні на жывых істотах, вызначаць мутацыі ў пухлінах. А значыцца — прыдумляць новыя лекі можна будзе хутчэй.

Перадавая праграма Labrugu сістэматызуе адкрытую інфармацыю з розных сусветных лабараторый, адсочвае змены і паскарае працу навукоўцаў.

Таксама аўтарытэтны навуковы часопіс бэсціць дзеячаў, якія падраблялі навуковыя працы. Да прыкладу, японец Ёшытака Фуджыі з Такійскага ўніверсітэта медыцынскіх і стаматалагічных даследаванняў у вочы не бачыў пацыентаў, якіх “даследаваў”, уключаў у працы суаўтараў без іх ведама.

Аднаго з амерыканскіх прафесараў за фальсіфікацыі адправілі выкладаць хімію ў звычайную школу.

Натуральна, што ў 2012-м годзе СМІ грымелі навінамі пра марсаход Сuriosity.

А ўлетку стала вядома пра адкрыццё “базона Хігса” — субатамнай часціцы, якая тлумачыць, чаму матэрыя мае масу і як увогуле функцыянуе Сусвет.

Што тычыцца “базона Хігса”, то да пошукаў часціцы спрычыніліся і беларускія навукоўцы.

“Беларускія фізікі ўдзельнічалі ў падрыхтоўцы і правядзенні эксперыментаў на Вялікім адронным калайдары, што прывяло да адкрыцця часціцы-базона Хігса”, — паведамляе прэс-служба Нацыянальнай акадэміі навук Беларусі.

Але на самай гары рэйтынгу дзесяці высокіх дасягненняў беларускіх навукоўцаў — іншы факт.

“Па-першае, гэта наш спадарожнік”, — прэс-сакратар НАН Беларусі Наталля Марцалева ставіць на вяршыню нашага навуковага рэйтынгу Беларускі касмічны апарат (БКА ці БелКА, як прызвычаіліся казаць у народзе).

“Запуск 22 ліпеня 2012-га года завяршыў стварэнне Беларускай сістэмы дыстанцыйнага зандавання Зямлі”, — выдзелена тлустым у прэс-рэлізе Акадэміі навук.

Хоць здымкі са спадарожніка пакуль грамадству не дэманстраваліся.

Сярод беларускіх дасягненняў нямала такіх, якія ў будучыні мусяць дапамагчы нашай медыцыне. Напрыклад, айчынныя інфарматыкі і біяхімікі сканструявалі чатыры хімічныя злучэнні, якія нейтралізуюць актыўнасць да ВІЧ-1.

“Злучэнні здольныя да блакады функцыянальна важных участкаў абалонкі віруса і прадстаўляюць перспектыўныя базавыя структуры для стварэння новых лекавых прэпаратаў супраць СНІДу”, — паведамляецца пра адкрыццё.

Беларускія хімікі сярод іншага распрацавалі тэхналогіі атрымання супрацьпухлінавых генерычных лекаў першага пакалення “Пеметраксед” і “Азацытыдзін”.

Да таго ж нашы фізіёлагі і біяфізікі стварылі прыладу, якая дазваляе паскорыць пераўтварэнне ствалавых клетак у нейроны. Гэта ў будучыні мусіць дапамагчы ў лячэнні захворванняў кровазвароту мозга.