Падчас жалобы з экранаў прыбралі камедыі і адмянілі канцэрты

Нягледзячы на тое, што афіцыйная жалоба была абвешчаная толькі на адзін дзень, забаўляльная праграма Мінска згодна з распараджэннем Мінгарвыканкама змянілася амаль на тыдзень.

Так, кінаманы на тры дні пазбавіліся камедый. Засталіся на вялікіх экранах драмы і фэнтызі. Пра змены рэпертуару Еўрарадыё распавёў генеральны дырэктар “Кінавідэапракату” Васіль Коктыш.

“Мы паздымалі ўсе камедыі. Мы знялі з пракату “Болей, чым сэкс”, “Рыа”. Засталіся драмы, бо мы не можам зачыніць кінатэатры. У асноўным засталіся фэнтэзі, трылеры. Гэта “Забаронены прыём”, “Зыходны код”, “Лінкольн для адваката”. У такім рэжыме кінатэатры будуць працаваць тры дні – па пятніцу ўключна. Усе гэтыя пытанні мы ўзгаднялі з праваўладальнікамі”.

З суботы, 16 красавіка, мінскія кінатэатры запрацуюць па звыклым раскладзе. Па словах Коктыша, у дні жалобы, гледачы і самі не вельмі хочуць наведваць кінатэатры.

На культурная праграма Ўправе Партыі БНФ таксама змянілася. У панядзелак быў адменены канцэрт барда Змітра Казлоўскага, у аўторак – прэзентацыя кнігі Ўладзіміра Падгола. Але на Ўправе мяркуюць, што ўжо ў пятніцу мерапрыемствы мусяць аднавіцца.

“У пятніцу планаваўся канцэрт салідарнасці з Японіяй “Востраў надзеі”. Сумная нагода і ў прынцыпе пятніца – ужо можна адмяняць траур пакрыху вось такімі сумнымі нагодамі”.

У пятніцу, 15 красавіка не адбудзецца выступ піцерскага гурта “Animal ДжаZ”. Імпрэза перанесены на суботу! Арганізатар канцэрта Зміцер Хламаў падцвердзіў гэтую інфармацыю:

“Канцэрт адбудзецца 16 красавіка ў 20:00. Было вырашана перанесці на дзень.”

Праз тэракт у мінскім метро адменены выступ легенды сусветнага джаза – аркестра Дзюка Элінгтана, які мусіў адбыцца 12 красавіка ў Вялікай залі мінскай Філармоніі. Адмовіўся ад канцэртаў у сераду і чацвер БДА “Песняры”.

У галерэі “Ў” адмянілі прэзентацыю выставы Васіля Пачыцкага, што мусіла адбыцца 12 кастрычніка. Але дзеючая выстава працуе. А вось у бары “Малако” адмовіліся ад усіх запланаваных канцэртаў і вечарынаў па суботу ўключна.Змяніўся і плэйліст у бары: зараз грае нейтральная музыка, у асноўным, класічны джаз.

Жалоба не абыйшла і футбольны чэмпіянат Беларусі. Чацвёрты тур, які пройдзе 15 красавіка, пачнецца з хвіліны маўчання. Пра гэта Еўрарадыё паведамілі ў прэс-службе Беларускай федэрацыі футбола:

“Усе матчы будуць пачынацца з хвіліны маўчання. Усе каманды выйдуць на поле ў жалобных павязках”.

Нагадаем, 13 красавіка ў Мінску абвешчаная жалоба па ахвярах тэракта, што адбыўся ў мінскім метро 11 красавіка.

Фота: Life