Сяргей Вазняк: Знойдуцца людзі, якія працягнуць "Гавары праўду!"

Мінюст адмовіўся рэгістраваць грамадскае аб'яднанне "Гавары праўду!", спаслаўшыся на адсутнасць арыгіналаў некаторых дакументаў. Між тым, дакументы гэтыя пасля снежаньскага ператрусу ў офісе кампаніі знаходзяцца ў распараджэнні спецслужбаў. Пра што Мінюсту выдатна вядома.

У распараджэнні спецслужбаў — пад хатнім арыштам — знаходзіцца сёння і лідэр "Гавары праўду!" Уладзімір Някляеў. З яго поўным вызваленнем і звязваюцца далейшыя перспектывы кампаніі.

Як сказаў Радыё "Свабода" адзін з арганізатараў "Гавары праўду!" Сяргей Вазняк, трэба дачакацца Някляева, які планаваў працягваць кампанію і пасля выбараў. "Думаю, цяпер самае важнае — каб усе людзі выйшлі на свабоду. Я ўпэўнены, што знойдуцца людзі, якія захочуць працягваць гэтую працу".