У Брэсце "маўклівая акцыя" зноў ператварылася ў шэсце

Прыкладна а 19.00 каля 700 чалавек сабраліся ў раёне плошчы, на якой ладзілі канцэрт. “Рэвалюцыянеры” крыху паслухалі выступленне ваеннага аркестра, а потым рушылі ў бок ЦУМа па вуліцы Пушкінскай, збочваючы на вуліцу Савецкую. Да шэсця далучалася ўсё больш мінакоў.

А 19.40 спецназ перакрыў Савецкую ля помніка 1000-годдзя Брэста. Натоўп прымусілі збочыць на Гогаля. Там пачаліся першыя затрыманні. У рацыі міліцыянтаў было чуваць загад “затрымліваць усіх, хто пляскае ў ладкі”.

“Маўклівае шэсце” працягнулася па бульвары Касманаўтаў, але яго таксама перакрылі. Падцягнуліся аўтазакі і міліцэйскія машыны. Людзі пачыналі разыходзіцца, але іх затрымлівалі. Паводле розных звестак, ад 50 да 70 чалавек даставілі ў Ленінскі РАУС для высвятлення асобаў.

Як паведаміў праваабаронца Раман Кісляк, на затрыманых пачалі складаць пратаколы па артыкуле "Парушэнне парадку арганізацыі або правядзення масавага мерапрыемства або пікетавання".