У Вольгі Класкоўскай не ўзялі перадачу для маці Ліхавіда
Грамадская актывістка і сястра іншага палітвязня, Аляксандра Класкоўскага безвынікова чакала пад сценамі Акрэсціна чатыры гадзіны на спёцы.
Яна прыйшла да ізалятара, каб падтрымаць Алену Ліхавід, маці асуджанага за Плошчу Мікіты Ліхавіда. Жанчына адбывае 10-суткавы арышт за ўдзел у “маўклівай акцыі” 20 ліпеня. У Вольгі не ўзялі перадачу і абгрунтавалі гэта тым, што ў гэты дзень для Ліхавід перадача ўжо была.
Пры гэтым супрацоўнікі турмы прызналі: няма такога дакумента, які забараняе прыносіць перадачы аднаму чалавеку часцей чым раз на дзень. Не ўзялі нават пітную ваду для арыштаванай. Але прапанавалі Вользе Класкоўскай стаць у чаргу яшчэ раз, каб паспець адправіць перадачу да 18.00, перадае БелаПАН.
