Сабаленка абыграла Світоліну і выйшла ў паўфінал "Ралан Гарос"
Эліна Світоліна І Арына Сабаленка / https://twitter.com/rolandgarros
Арына Сабаленка (2-я ракетка свету) выйшла ў паўфінал "Ралан Гарос". У аўторак у паядынку 1/4 фіналу яна абыграла ўкраінку Эліну Світоліну (192) — 6:4, 6:4. Дагэтуль беларуская тэнісістка не даходзіла да гэтай стадыі адкрытага чэмпіянату Францыі. Наступная саперніца — Караліна Мухава (43) з Чэхіі.
На старце турніру Сабаленка абыграла яшчэ адну прадстаўніцу Украіны Марту Касцюк (39).
У Парыжы Арына Сабаленка спачатку адмовілася адказваць на пытанне пра яе стаўленне да Аляксандра Лукашэнкі і вайны ва Украіне, а пасля перастала ўдзельнічаць у агульных прэс-канферэнцыях. Мяркуецца, што такім чынам яна намагалася пазбегнуць "правакацыйных пытанняў".
