Самыя шчаслівыя людзі Еўропы і сабачка на вяршыні піраміды Хеопса — #ІхНоравы

Сабака стаў самай незвычайнай знаходкай на вяршыні 139-метровай піраміды Хеопса, прызнанай самай вялікай у Гізе. У каментарах да відэа, якое апублікаваў мужчына, сабаку называюць Анубісам і пытаюць, колькі часу яму спатрэбілася на пад'ём.

Ці атрымалася зняць сабаку з піраміды, невядома. Выпадак стаў нагодай для абмеркавання бяспекі ў Гізе. Многія жыхары і турысты паставілі пад сумнеў намаганні мясцовых уладаў па захаванні археалагічнай спадчыны.

Сёння ўзыходжанне на Вялікую піраміду караецца трыма гадамі турмы. Таксама на парушальніка могуць накласці штраф ад 205 да 2060 долараў.

Вельмі старажытны нефрытавы дракон

Падчас раскопак у Чыфэне ў аўтаномным рэгіёне Унутраная Манголія археолагі знайшлі нефрытавага дракона узростам 5000 гадоў.

Памер статуэткі — 15,8 см у даўжыню і 9,5 см у шырыню. Дракон аказаўся самым буйным з тых, што калі-небудзь знаходзілі і якія належаць да культуры Хуншань. Артэфакт захоўваўся ў грабніцы разам з чалавечымі парэшткамі і керамічнымі прадметамі. У іх ліку — розныя кубкі і тазы.

Падобных драконаў археолагі знаходзяць часта. Праўда, навукоўцы не ўпэўненыя, што нефрытавыя драконы на самай справе ўяўляюць сабой драконаў, бо ў эпоху неаліту яны маглі мець іншае значэнне.