Сёлета 21 чалавек здаў ЦТ па беларускай мове на 100 балаў
21 чалавек здаў цэнтралізаванае тэставанне па беларускай мове на 100 балаў. Такую лічбу назваў агенцтву БЕЛТА дырэктар Рэспубліканскага інстытута кантролю ведаў (РІКВ) Юрый Міксюк.
Па яго словах, гэта менш, чым летась: у 2017 годзе ЦТ па беларускай мове на 100 балаў здалі 32 абітурыенты. Затое сярэдні бал сёлета вышэйшы, чым у мінулым годзе — 35,92 супраць ранейшых 34,25.
Значна зменшылася і колькасць абітурыентаў, якія не перакрочылі ніжні парог адзнак ЦТ. "Менш за 10 балаў па беларускай мове сёлета набралі 1335 абітурыентаў, што склала 5,6%. Летасць іх было болей — 2040 чалавек (7,5%)", — заявіў Міксюк.
Вынікі ЦТ па рускай мове стануць вядомыя 26 чэрвеня.
