Сёлета з Беларусі дэпартавалі ўжо 1,5 тысячы замежнікаў

Ад пачатку года з Беларусі было дэпартавана паўтары тысячы замежнікаў. Такую статыстыку паведамілі тэлеканалу СТБ у Дэпартаменце грамадзянства і міграцыі МУС.

Міліцэйскія чыноўнікі падкрэслілі, што замежніка могуць дэпартаваць за невыкананне беларускага заканадаўства. Прычым бываюць выпадкі, калі дастаткова аднаго парушэння.

"Пяць і больш парушэнняў на працягу года, калі замежнік лічыцца прыцягнутым да адміністрацыйнай адказнасці. Але ў асобных выпадках іншаземец можа быць выправаджаны з нашай краіны пасля аднаразовага грубага парушэння", — кажа начальнік Дэпартамента па грамадзянстве і міграцыі Іван Новікаў. Грубымі парушэннямі лічацца, напрыклад, п'янае кіраванне або хуліганства.

Паводле Новікава, сёлетнія дэпартацыі замежнікаў звязаныя з адміністрацыйнымі парушэннямі, у тым ліку — з ігнараваннем Правілаў дарожнага руху.