Сёння ў Вільні перапахаваюць Каліноўскага і іншых паўстанцаў (трансляцыя)

У былую сталіцу ВКЛ прыехалі сотні, а можа і тысячы беларусаў. Афіцыйную дэлегацыю ачоліў віцэ-прэм'ер Ігар Петрышэнка. Польшчу прадстаўляе прэзідэнт Анджэй Дуда. Ад Украіны і Латвіі будуць прадстаўнікі ўрадаў.

Падчас урачыстай цырымоніі парэшткі паўстанцаў даставілі ў Віленскі кафедральны сабор, потым перавязуць на могілкі Росы.

Кастусь Каліноўскі (1838 — 1864) — нацыянальны герой Беларусі. Ён не толькі кіраваў вызваленчым паўстаннем, але і выдаваў беларускамоўную "Мужыцкую праўду". Пакінуў нам свае знакамітыя "Лісты з-пад шыбеніцы".

У афіцыйных СМІ Беларусі ў апошнія гады неаднаразова сцвярджалася, што Каліноўскага нельга лічыць нацыянальным героем Беларусі, а паўстанне 1863-га называецца "польскім".

"Я ведаю ролю гэтага чалавека, — гаварыў нядаўна Аляксандр Лукашэнка пра кіраўніка паўстанцаў. — Каліноўскі быў нашым грамадзянінам, жыў і працаваў на нашай тэрыторыі. Але там шмат нюансаў...".