Трамп абумовіў зняцце санкцый з Расіі скарачэннем ядзернай зброі

Дональд Трамп абумовіў зняцце санкцый з Расіі скарачэннем ядзернай зброі. Ён гатовы гэта прапанаваць Уладзіміру Пуціну, заявіў абраны прэзідэнт ЗША ў інтэрв'ю брытанскай газеце Times.

"Супраць Расіі ўведзеныя санкцыі — давайце паглядзім, ці нельга дамагчыся добрых дамоўленасцяў з Расіяй, — цытуе словы Дональда Трампа Times. — Для пачатку, я лічу, што ядзерную зброю трэба скарачаць, і скарачаць вельмі істотна, гэта магло б быць складовай часткай гэтага працэсу. Аднак Расія цяпер моцна пакутуе з-за санкцый, а я думаю, што можа адбыцца нешта такое, ад чаго шмат людзей выйграюць".

Трамп раскрытыкаваў расійскую ваенную кампанію ў Сірыі, якая, паводле яго слоў, прывяла да "жахлівай гуманітарнай сітуацыі". Ён заявіў, што пачне сваю дзейнасць на пасадзе прэзідэнта ЗША з таго, што будзе давяраць расійскаму прэзідэнту і канцлеру Германіі Ангеле Меркель. Пры гэтым прызнае, што такі давер можа доўга і не працягнуцца. Трамп крытыкуе Меркель за тое, што яна дапусціла мільён мігрантаў у Германію, называе гэта "катастрафічнай памылкай".

Дональд Трамп гатовы ў бліжэйшыя тыдні прапанаваць Вялікабрытаніі "справядлівую" здзелку, каб зрабіць выхад гэтай краіны з Еўрасаюза "вялікай справай". Ён запрасіў брытанскага прэм'ера Тэрэзу Мэй адразу ж пасля свайго ўступлення на пасаду прэзідэнта наведаць ЗША. Трамп лічыць, што і іншыя краіны будуць выходзіць з ЕС.

Абраны прэзідэнт ЗША паабяцаў умацаваць межы Злучаных Штатаў, у тым ліку шляхам увядзення абмежаванняў на ўезд еўрапейцаў. А тых, хто прыедзе з краін, дзе распаўсюджаны ісламскі тэрарызм, чакае жорсткая праверка. Дональд Трамп раскрытыкаваў знешнюю палітыку ЗША. Ён лічыць, што вайна ў Іраку — гэта, верагодна, найгоршае рашэнне ў гісторыі краіны, а справы ў Афганістане ідуць дастаткова кепска, інфармуе "Бі-Бі-Сі".

Нагадаем, Дональд Трамп атрымае прэзідэнцкія паўнамоцтвы 20 студзеня.